Shillong, Jylliew 18: Ka jingther jong u lap bah ha kine ki khyndiat sngi haka jylla Meghalaya kala wanrah ka jingjulor kaba bun ïaki shnong ki thaw bad ka jingshah ktah jong ki iing ki sem bad katkum ka jingkheiñ bala ioh lum na ka Meghalaya State Disaster Management Authority, kumba 42 tylli ki shnong kila shah ktah haki 6 tylli ki district jong ka jylla bad 2 ngut ki mynsiem briew kila duh noh ïala ka jingim bad kumba 36 tylli ki jingtei kila shah pynjulor.
Haba phai sha ka jingshah ktah haki district bapher bapher, ka West Garo Hills kadei kawei naki district ka ba la shah ktah bha na kane ka jingther slap bad haduh 24 tylli ki shnong ki la shah ktah, kKumjuh ruh ar tylli ki iing bad 15 tylli ki jngtei ki la shah pynjulor ha ka jngther u slap.
Ha East Khasi Hills hapdeng ka 10 tarik Jylliew haduh 17 tarik Jylliew, tang kawei ka shnong kaba la shah ktah bad uwei u rangbah bala tip kyrteng kum u Probino Warbah na Tynring u la ngam jyllop ha ka wah Umrynjah, Mawlai.
Ha East Jaiñtia Hills ruh tang kawei ka shnong bad kumba 1078 ngut ki briew kiba la shah ktah ryngkat ki jaka rep bad ki jingthung jingtep ba don kumba 3.45-hectare.
Ha Eastern West Khasi Hills ar tylli ki shnong ki la shah ktah bad 3 tylli ki ïing ki la shah pynjulor.
Ha South West Khasi Hills District ki shnong kiba la shah ktah ki don kumba 11 tylli ba kynthup ka jingshah pynjulor jong ki iing ki sem, ki jaka rep bad ki jingtei.
Ha West Khasi Hills District kumba 3 tylli ki shnong kila shah ktah bad uwei u rangbah u la duh noh ïala ka jingim naka jingshah pom pyrthat.
