Nongpoh, Jylliew 18:
Ka kynhun ba kyrpang jong ki pulit ka Ri Bhoi mynta ka janmiet ki la ioh ban kem noh ia saw ngut ki runar kiba dei na ka jylla Assam, kiba la wan ban lute ia ki trok bad ki kali kamai ha ki surok bah jongka jylla. Kane ka jingiohkem kadei hadien ka jingkthong jong ki bor pulit ka la pynkyndit ia kiba bun ki paidbah ka sor Nongpoh namar kala don ruh ka jingther kuli jong ki pulit pyrshah ia kitei ki runar marjan bad ka thanad Nongpoh.
U Bah Banrap Jyrwa, Additional Superintendent of Police ka Ri Bhoi haba kren sha ki lad pathai khubor hadien ak jingiohkem ia kitei ki saw ngut ki runar, u la iathuh ba na ka liang ki bor pulit ki la ioh jingtip la bunsien halor ka jingdon ong ki runar ban lute naphang ia ki trok bad kali kamai ha ki surokbah, kiba shoh bad byrngem byrsit ia kito ki bym siew.
U Bah Banrap Lyngdoh, u la iathuh ruh ba mynta ka janmiet, katba ki bor pulit dang pynlong ia ka jingtalasi ia ki kali ha ka surokbah kaba dang hap ha ki bynta jong ka shnong Saiden, la don uwei u nongniah trok uba la pyntip shaki, halor katei ka jingdon jong ki runar kiba lute ia ki trok ha ki thain Umsning bad kumta la pyntip ia kane sha ki bor pulit ka thanad Umsning bad Umiam ban leh ia kaba donkam.
Katba kitei ki runar ki leh ia katei ka kam lute bad thmu ruh ban rahbor ia uwei u nongniah trok na ka jylla Jharkhand, ki pulit ka Umsning ki la iohi ia kitei ki runar kiba la pyndonkam lyngba kawei ka kali Scorpio rong lieh, ka bym pat don satia ia u registration number. Kitei ki runar mar ia iohi ia ki pulit, kip het krad na katei ka jaka bad khynniat shabar ia utei u nongniah trok uba ki la thmu ban rahbor.
La iathuh ba kitei ki runar, ki la phet krad sha ki bynta jong ka sor Nongpoh bad na ka liang ka kynhun ba kyrpang jong ki pulit kiba la kthong ia kitei ki runar kiba la niah pynher sted bha ia ka kali. Na ka liang ki pulit ka thanad Nongpoh ki la pynlong ruh ka jingpynap shrip marjan bad ka thanad Nongpoh.
Kitei ki runar haba ki iohi ia ka jingpynapshrip ki pulit ka Nongpoh, ki la thmu ban rat naphang da ka jingthmu ban pyniap ia ki pulit kiba don katei ka jaka bad pynpyniaid ia ka kali lyngba ka surok service lane. Ki bor pulit ha katei ka por, la iathuh ruh ba ki la hap ban pyndonkam da ka bor ban siat ia kitei ki runar, hynrei ki la lait salit bad pynher beit iala ka kali, kaba la buh jingma shikatdei ia ki paidbah nongleit nongwan bad ruh ia ki kali kiba la pynieng harud jong ka surok ka sor Nongpoh.
Hadien ka jingkthong kaba bud pat sha ki bynta jong ka dong Downgate ka sor Nongpoh, ki pulit ki la ioh noh ban kem ia kitei ki runar ha kawei ka khlaw kaba don marjan. Kitei ki saw ngut ki runar kiba la ngat noh ha ka kti jong ki pulit ki kynthup ia u, u Tulan Phukan (36) na Nirkholoiguri, Sivasagar, Lakhimpur, u Pranjal Gogoi (38) na Kakopathar, Tinsukia, u Deep Das bad u Pradip Gogoi (38) na Lahual, Chandmai Gaon, Dibrugarh na ka shnong Bugaghat, baroh kidei na ka jylla Assam.
Utei u heh pulit u la iathuh ruh na ka liang jong ki bor pulit ki la ujor ejahar pyrshah ia kitei ki saw ngut ki runar bad pyntip ruh ba ka jingtohkit ban lap dien shuh shuh ia ki kam tuh kam lute jong kitei ki runar lem bad kiwei de kiba donkti ban leh ia kitei ki jaidkam ka dang iaid shakhmat.
