Nongpoh, Naiwieng 28: Ki 2 ngut ki nongshong shnong ka Belahari ha ka thain Western Ri Bhoi ki la shah kem ha ki nongtrei ka tnad Forest jong ka jylla Assam, kaba dei tang na ka daw ka jingeit pom dieng na kawei ka khlaw shnong jong ka Belahri, hynrei ki nongtrei ka tnad Forest na Assam ki la wan kem ia kitei ki ar ngut ki nongshong shnong khlem da map satia.

Kine ki 2 ngut kiba la shah kem hynnin ka sngi ki kynthup ia u Benustar  Nongphlang  bad uwei pat uba dang rit ka rta ba ki nongtreika tnad Forest ki la pynlait noh hadien ba la shah kem, hynrei ia utei u rangbah pat ki la kem ki la rah noh sha Assam halor katei ka jingkynnoh pom dieng.

Kumba la ioh ban ia kren bad u Deputy Commissioner ka Ri Bhoi, u Abhilash Baranwal u la iathuh halor kane ka jingjia ba shah kem kitiei ki ar ngut na Belahari u la shim khia ban ia kren bad ki bor synshar District ka Kamrup  bad ha kajuh ka por ruh u la kren ia u DFO ban ia kren halor kane ka kam.

U la iathuh ruh uwei napdeng ba la shah kem ki la pynlait noh na ka daw kaba u dang rit ka rta katba ia utei uwei pat u rangbah ki la kem bad rah sha Assam.

Shuh shuh, u la pynpaw ruh ba ka bor synshar District kan dang shim khia ban ia kren halor katei ka jingshah kem kitei ki 2 ngut bad kyrmen skhem ba da ka jingshim khia ban ia kren ki bor synshar District ka Kamrup bad ka tnad Forest kin pynlait noh ia utei pat u rangbah uba dang don hapdeng ka jingtohkit ki briew ka tnad Forest na Assam.