Nongpoh, Naiwieng 28: Da ka jingkyrshan ka sorkar India bad shi bynta halor ka thong ka ‘100-Day Intensive Action Plan’ kan don ka jingtrei borbah ban pynduhjaid ia ka jingshongkha khynnah ha ka ri India hi baroh kawei. Ka FXB India Suraksha, kawei na ka kynhun treimon sngewbha ka la shim ia ka thong ban ia trei ryngkat bad ki kynhun bapher bapher ha Ri Bhoi District na ka bynta ban pynlong ia kane ka District kum kata ka District kaba lait na ka jingshongkha khynnah.
La plie paidbah ruh haka ri India hi baroh kawei lyngba ka ‘100 Days Intensive Awareness Campaign’, kaba dei ruh ka thong jong ka Bal Vivah Mukt Bharat, ba ki la buh thong ban pynshai ne ai jinghikai ban pynduhjaid ia ka jingshongkha khynnah da kaba kin ai jinghikai ha ki skul, ki college, ki jaka mane blei, ha ki shnong ki thaw na ka bynta ban pynthikna ban pynkut noh ia ka kam shongkha khynnah kaba dei kam bein pyrshah ia ki khynnah.
Ka FXB India Suraksha ka dei ka kynhun ba ia trei lang bad ka Just Rights for Children (JRC) ha India, kaba dei ruh ka shnat treikam ba khlain kaba don haduh 250 tylli ki kynhun kiba trei na ka bynta ban pynduh ne pynkut noh ia ka jingshongkha khynnah ha ki 451 tylli ki District ha ri.
Kum ka jingplie paidbah mynta u snem ia kane ka thong ka jong ka ‘Bal Vivah Mukt Bharat’ la pynbna paidbah ha ka 27 tarik u Naiwieng 2024 ban pyntreikam ia kane ka thong. Ka FXB India Suraksha. Kum ka kynhun ka la pynlong ia ki prokram ai jinghikai bapher bapher ha ki skul, ki college, ha ki shnong bad shim ruh ia ka jingsmai ban pyndep ia kane ka thong ha ki District bapher bapher.
U Deputy Commissioner ka Ri Bhoi u Abhilash Baranwal, u la lamkhmat ia kane ka prokram ai jinghikai bad pynpaw ruh da kaba ong, “Ka jingshongkha khynnah ka dei ka kam sniew bad baroh ki nongshong shnong ki hap ban don ka jingkitkhlieh ba ka kam shongkha khynnah kam dei ban jia ha kane ka District”
U la ong ruh ba ngi dei ban ia trei lang ban pynlong ia ka Ri Bhoi District kum ka District kaba lait na ka jingshongkha khynnah. Shuh shuh, u la ong ruh ba lyngba kitei ki kynhun kin iakhun ban pynphriang ia ka khubor ba ka jingshong kha khynnah ka dei ka kam sniew bad kino kino kiba don bynta ha ka kam ban pynshongkha khynnah ki sa shah pynshitom katkum ka Child Marriage Act.