Shillong, Naiwieng 28: U Myntri ka tnat Community and Rural Development (CRD) u Bah Sosthenes Sohtun hynne ka sngi u la lum ka jingialang ban iathir halor ki sienjam ba donkam ban shim naka bynta ban pynkhlain shuh shuh ka jingshakri kiba ia dei bad ka roi ka par shaki paidbah nongshong shnong ka Jylla.

Ha kane ka jingialang la don lang u Director, Joint Director, ki Project Director, ki Block Development Officer (BDO) jong baroh 56 tylli ki Block jong ka Jylla Meghalaya.

Haba kren shaki lad pathai khubor u Bah Sosthenes u la ong nalor ka jingiathir sani halor ki sienjam ban pynkhlain ka jingshakri paidbah, haka jingialang la iakren ruh, kumno ban pyniajan hapdeng ka Ophis BDO bad ki paidbah khamtam haki thain nongkyndong na ka bynta ban poi ryntih ki kam pynroi kumba donkam u paidbah.

U Bah Sosthenes u la iathuh ba kane ka jingialang kadei ka sien kaba nyngkong ba u la lum hadien ba u shimti kum u Myntri ka tnat CRD ka Sorkar Meghalaya.

“Haka jingialang ngi la ioh ban ia sam mar kylliang haba iadei bad ki mat bad ki sienjam, kumno ba ngin lah ban pynbha shuh shuh haba iadei bad ki jingshakri baki Ophisar kiba don haki Ophis baki dei ban ialeh ban ai ka jingshakri ba janai shaki nongshong shnong” la ong u Bah Sosthenes.

U Myntri u la iathuh ba haka jingialang kala don ka jingiathir kaba sani bha haba iadei bad ki shnong kiba duna bha iaka Mobile Network kaba buh jingeh iaki paidbah ban ioh jingtip shaphang ki jingmyntoi baka ohphis BDO ka don ban sam shaki nong shong shnong. “Ki don ki skhim bad ki Project bapher bapher kiba don haki Mobile Phone hynrei ki don ki shnong kiba ym don Mobile Tower ban pynbiang iaka Network kaba buh jingeh iaki VEC, ki Chairman, ki Secretary bad ki SHG ban tip shaphang ki jingshakri paidbah baki Ophis ki don, namar kata haka jingialang nga la bthah iaki BDO ban shimkhia halor kane” u la ong.

U la ong ba haka jingialang u la bthah iaki BDO ban shimkhia iaki jingeh baki nong shong shnong ki kynduh daka kyntu iaki ophisar ban pynbit pynbiang iaki rukom pyntreikam iaki skhim bapher bapher.

U Myntri u la ban jur baka jingtreikam ki ophisar haki Block bapher bapher kadei ban long kaba iaid beit iaid ryntih khnang ban pynsuk bad khnang baki paidbah kin ioh iaki jingmyntoi baka por kaba dei.