Nongpoh, Naiwieng 29: U Deputy Commissioner ka Ri Bhoi District kum u District Collector u la pynbna ba shen ka sorkar jylla lyngba ka tnad Transport kan shim jaka na ka bynta ban pynheh ia ka surok kaba pyniasoh na ka surokbah ha Umroi Madan shaduh Airport bad ia kane ka jingthmu ban shim jaka ban pynheh ia ka surok la bthah lyngba ka tnad Transport ka sorkar Meghalaya.

Haba kren sha ki lad pathai khubor, u Deputy Commissioner ka Ri Bhoi bad uba dei ruh u District Collector u Abhilash Baranwal , u la ong ba na ka bynta ka jingpyntip sha ki paidbah la khang pyrshah ban shna ia kino kino ki jingtei kiba thymmai harud katei ka surok ba ka sorkar ka thmu ban shim jaka kata hapoh 8.5 meters na baroh ar liang surok bad lada ki thmu ban tei kino kino ki jingtei ruh ki hap ban pan jingbit shwa na ka ophis u Deputy Commissioner.

U la pynbna ruh ba kino kino ki jingtei kiba khlem da ioh jingbit la ki dei kiba shipor ne ba ki pyndokam shi rta ha kitei ki jaka ba thmu ban shim daka sorkar kin nym ioh ia ka bai lutksan lada khlem ioh bor da ka ophis u Deputy Commissioner.

Shuh shuh, u la bynrap ruh kane kan treikam la ki de ki riew shimet ne ki jingtei kiba dei na ka bynta ka khaïi ka pateng  bad kane ka hukum kan treikam mardor tang hadien ba la dep ban pynbna paidbah ha ki lad pathai khubor.