Nongpoh, Nohprah 01: Ki nongialam shnong Umniangbyrnai Parila ha ryngkat ka jingsynranlang da ki nongialam ka Ri Bhoi Youth Welfare Organization (RBYWO), mynta ka sngi, ki la phah jingthoh sha ophis ka District Medical Health Officer (DMHO), kata ka long ban pan jingshai halor ka rukom thep kam ia ki samla ha katei ka shnong, na bynta ba kin trei ha ki kam barit baria kiba don hapoh ka Maternity and Child Health (MCH) kaba shen yn sa plie noh hapoh ka shnong Umniangbyrnai Parila.

Ha ka jingshisha lyngba jong katei ka sngi, ka jingthmu jong kitei ki nongialam shnong Umniangbyrnai Parila, kaba la ialam da u Bah Pynshngain Marbaniang, Rangbah shnong, nangta u Bah Robinroy Sakra, Secretary shnong, ia kaba la synranlang ruh da u Bah Ban Kharnaior, uba dei President ka RBYWO, ki nongialam shnong bad ki dkhot ka RBYWO, ki la thmu ban leit kynduh ia ka DMHO, na bynta ban iakren sani halor ka rukom thepkam ia ki samla na katei ka shnong ha MCH, hynrei na ka jingbym don ka DMHO, ki la shuh buh noh tang da ka jingthoh.

Haba kren sha ki lad pathaikhubor, u Bah Pynshngain Marbaniang, u la ong ba nongrim kaba la pynlong ia ki nongialam shnong ba kin leit sha ophis ka DMHO, ka dei halor ba ka rukom thungkam thungjam ha katei ka MCH ka long kaba la shu leh lyndet, khlem da kynjoh ktien lang ia ki nongialam shnong, kata na bynta ki nongtrei ha ki kam barit baria ha katei ka Hospital.

U la ong ruh ba kumba ka long mynta, ki briew ha katei ka shnong, kim ioh jingtip ia kata ka rukom thungkam thungjam ha katei ka MCH, khamtam eh haba iadei bad ka soskular kaba la iateh naduh ka por ba ka shnong, ka la ai sngewbha ia katei ka jaka ban tei ia ka MCH, ha kaba ka jingiakut ka long ba na bynta ki kam ba dang lah ban trei da ki trai shnong, kaba mut dei ban ai beit sha ki trai shnong bad kum ki briew na ka shnong, ki sngewthuh ba ia ki kam kiba heh ba ki briew ka shnong bad katei ka thain ba kim lah, ia kata te kim don jingsngew eiei ruh em.

Namarkata, u la kyrpad ia ka tnat ka koit ka khiah bad kaba dei peit ia katei ka lain, ba kin pyrkhat kyrpang na bynta ki briew na katei ka shnong bad ia kiba marjan bad katei ka shnong, namar lada ki leh kumba ka long mynta, na ka liang ka shnong hi kam lah ban pdiang da lei lei ruh em, u la bynrap.

Katba na ka liang u Bah Ban Kharnaior, u la ong ba kum ka seng ka ai ka jingkyrshan kaba pura ia katei ka sienjam kaba la shim da ka shnong Umniangbyrnia Parila, ha kaba u la ong ruh ba kumba ka long mynta bad khamtam eh ha ka tnat ka koit la khiah la shu thep kam lymmuh khlem da don kata ka jingpyntip paidbah, hynrei la shu leh beit tang da ki katto katne ki briew.