Nongpoh, Nohprah  01: Ban pynpaw ia ka jingpyrshah kaba jur halor ka jingdon ki briew kiba bteng ban leh ia ki kam tih khyndew beain ha kiba bun jaka ha thain Marwet, Ri Bhoi, ki nongialam ka All Raid Marwet People Federation (ARMPF), mynta sngi ki la leit ban buh syndon da ka jingthoh sha u Abhilash Baranwal, Deputy Commissioner ka Ri Bhoi.

Ka nongrim kaba la pynlong ia ki nongialam ka ARMPF, ia kaba la ialam da u Bah Rink Sohpdang, President bad u Komol Shakwa, General Secretary, ba kin leit ujor syndon sha u DC, ka dei hadien ba nyngkong, ki la leit ban ujor sha u Range Officer ka tnat Forest kaba don ha 12-Mer, ban dawa na u ba u dei ban khang noh shisyndon ia ki kam tih khyndew bad kam pynjot mariang ha katei ka thain, hynrei utei u Heh ophisar ka tnat Forest, um shym la shimkhia eiei ruh em ban khang ia ki kam tih khyndew ha katei ka thain.

Haba kren sha ki lad pathaikhubor, kitei ki nongialam ka ARMPF, ki la ong ba ka kam tih khyndew bad ka kam pynjot mariang ka jur bha ha ka thian Marwet bad kaba la pyntyrkhong lut ia ki tyllong umbam umdih, kaba la wanrah jingeh ruh ia ki paidbah ba kin ioh ia ka umbam umdih kaba biang, ha kaba ka jia tang na ka jingbun kiba tih khyndew beain.

Haba iadei bad katei ka jingleit buh jingujor sha u DC, na ka liang ki nongialam ka ARMPF, ki la pynpaw ia ka jingsngewhun mynsiem, namar na ka liang u DC u la kular ban shimkhia halor katei ka mat bad ban khang noh ia ki kam tih khyndew ne ki kam pynjot mariang ha katei ka thian, la bynrap ki nongialam ka ARMPF.