Nongpoh, Jymmang 30: U MLA ka Nongpoh u Bah Mayral Born Syiem mynta ka sngi u la ioh ban kren bad pynsngew shibun ki mat kiba donkam khamtam ban kyntiew ïaka district kaba dei ruh ka Aspirational District haka jylla haka jingïalang kaba la long ha DRDA Conference Hall hakhmat u Myntri ka sorkar pdeng ba dei peit ïaka tnad Labour and Employment bad kumjuh ruh ïaka tnad Youth Affairs and Sports u Dr Mansuk Mandaviya.
Haba kren sha ki lad pathai khubor hadien ka jingïalang u Bah Mayral Born Syiem u la ong ba kum u nongmihkhmat u la ioh ban ïakren shibun ki mat naka bynta ka dong Ri-Bhoi khamtam ka Medical College kaba dei ka mat kaba la kham slem namar ka Ri-Bhoi District kum ka Aspirational District ka don hok ban ioh kawei ka Medical College, ban pynbun shuh shuh ki jingthiah bad ki jingshakri jong ka Nongpoh Civil Hospital khnang ba katei ka jingangnud kan urlong.
U la ong ruh ba ka Ri-Bhoi District ka donkam ruh ban pynbun ïaki jaka pule jong ka sorkar ban kyrshan bad ïarap ïakito ki longiing ba duk kiba jynjar ban phah pule ïala ki khun haki jingpule ba kham shalor.
Also Read | Umtyngngar-Sohra road to become double-lane, project to cost Rs 200 crore
Nalor kitei ki mat kiba ïadei bad ka them Ri-Bhoi u Bah Mayral u la ioh ruh ban ïakren halor ka ITI kabala shu shong tang haka iing wai mynta bad donkam ka jingkyrshan jong ka sorkar pdeng ban pyndep noh ïaka building bad khamtam ban dang pynbun shuh shuh ïaki tnad pule ha katei ka ITI. La ioh ruh ban ïakren kumno ban ïarap ïaki IVCS bad ki co-operative society khamtam ka jingeh jong ki nongri jingri namar bun ki nongri jingri ki shah khniot beit khamtam ka jingwan jong ki syiar ki sniang nabar ka jylla.
Ha kaba ïadei bad ka tnad ïalehkai naka liang u Bah Mayral u la ioh ban ïakren halor kumno ba ka Ri-Bhoi ruh kan ioh bynta ban pynlong ïaki jinglehkai bapher bapher jong ka National Games katkum ka jingbit bad jinglong jingman jong ka mariang.
Sa Peit Ruh
