Sdang urlong ki project ba dawa ka KSU naduh ki snem bala dep, ai jingïaroh ïa u DC

Nongpoh, 26 Jymmang : Ka Khasi Student Union North Khasi Hills District hapoh ka jingïalam u Bah Ferdinald Kharkamni kum u President bad u Samla James Hitler Mawphniang General Secretary ryngkat ki dkhot mynta ka sngi kila leit ban ïakynduh syndon ïa u Abhilash Baranwal Deputy Commissioner ka Ri-Bhoi District ban ïakren shibun ki kam kiba ïadei bad ka roi ka par ha Ri-Bhoi District khamtam kum ka seng kala ai ka jingïaroh ïa u DC ka Ri-Bhoi ba ki kam pynroi ba ka seng kala dawa haki snem bala leit noh kum ka jingdon ki street light, ki foot overbridge bad kiwei kiwei kila sdang ban urlong ha kane ka district.

Haba kren sha ki lad pathai khubor, u Bah Ferdinald u la ong ba naduh kaba sdang ka seng ka la ai jingmut ban buh ïa ki street light namar ka jingdum jong ka surok, ban tei ïa ki foot overbridge bad ban pynbha ïa ki thliew bad ki bynta kiba sniew jong ka surok na ka bynta ka jingshngaiñ ki paidbah nongleit nongwan.

U la ïathuh ruh ba mynta ki kam ki la sdang ban ïaid shakhmat bad ha kaba ïadei bad ki street light, la ïakren ba ki shnong kin hap ban peit ïa ki bill light hynrei ïa mynta ïa ka jinglut jingsep paidbah, ka NHAI ka dei ban bei shuwa katba ka jingïateh ba 20 snem kam pat kut bad shuwa ban aiti biang sha ka sorkar jylla.

Sa Pule Ruh | Ïoh pdiang u Bah Hally War da ka ‘Padma Shi Award’ ba pynneh pynsah ia ka Jingkieng Jri

Halor ka jingtei ïa ki foot overbridge, ka seng ka la ong ba kan dang buddien bad u Deputy Commissioner bathymmai uba sa wan shimti ïa ka kam ha Ri-Bhoi namar ki dang don katto katne ki jingeh kiba ïadei bad ki wire jong ka MeECL kiba lah ban wanrah jinglut lada hap pynkynriah.

Ka KSU ka la kyrpad ruh ba dei ban pynlong ïa ka jingjurip lang hapdeng ka ophis u DC bad ka seng ban wad ïa ka lad kaba biang ban pyntreikam ïa kine ki project khlem jingïakynduh jingeh.

Shuh shuh, ka seng ka la ai jingïaroh ïa u paidbah Deputy Commissioner, u Abhilash Baranwal, halor ka jingshimkhia bad ki kam kiba u la leh na ka bynta ka dong Ri-Bhoi kiba la wanrah ïa ka jingpynitynnad bad jingïada ïa ki paidbah nongleit nongwan.

Ha kane kajuh ka sngi, ka KSU NKHD ka la pynkup burom ruh ïa u Abhilash Baranwal bad ai khublei ïa ka jingshakri jong u shuwa ba un mih noh na Ri-Bhoi ban leit shimti kum u Deputy Commissioner ka East Khasi Hills District.

Sa Peit Ruh