Nongpoh, Risaw 16: Hadien da ki phew tylli snem ba ki paidbah ki la shah iehnoh bein ha ki 15 tylli ki Shnong kiba don ha ka Thain Block 2 ha Ri Bhoi District, ka shnong khappud Meghalaya bad Assam, 8 tylli ki shnong ki la ioh ban pdiang ia ki kam pynroi na ka bynta ban shna bha ia ki skul kaba dei lyngba ka skhim ba la mang kyrpang da ka Chief Minister Development Fund ha ka dor kaba la mang haduh T. 64,00,000 Lakh ba kitei ki 8 tylli ki skul kin ioh lyngba kane ka bhah kaba long T. 8 lak tam kawei ka skul ban kyntiew ia ka pule ka puthi ha kitei ki shnong khappud.
La sakhi ruh ba kitei ki 8 tylli ki shnong ki la ioh ia ki kam pynroi ban kyntiew ia ka pule ka puthi, ka dei ha ka jingialang kaba la long ha ka 15 tarik u Risaw 2024, ba u MLA bad MDC ka Mawhati u la sam ia ki work order ha ka jingialang kaba la long ha Iing dorbar ka Shnong Umlaper.
Ha kane ka sngi, u MLA ka Mawhati u Bah Charles Marngar u la noh synniang ruh lyngba ka skhim MLA ha ka dor kaba T.50 hajar kawei kawei ka skul nalor katei ka song jingiarap ba ki la ioh lyngba ka Chief Minster Fund. Kane ka jingnoh synniang kaba T. 50 hajar ka long ruh ban kyrshan tulop ia ki nonghikai, ha kaba man la u snem un bteng ban iarap na ka bynta ban kyrshan ia kitei ki skul.
Kitei ki 8 Tylli ki shnong kiba la ioh ia kane ka jingiarap ki Kynthup ia Shnong Umsder, Pdengtleit, Ummat 1, Ummat 2, Umlaper, Umhi, Sabuda bad ka Khliehumwang. Kine ki 8 tylli ki shnong baroh shi katta kim don ia ka iingskul kaba biang, hynrei ki la shu pynlong skul ha ki iing dorbar Shnong ba la shu ai sngewbha da ka shnong bad don ruh kiba la shu shna hi da ki siej bad tap tin malu mala.
Kumba la pynpaw, ki kam pynroi kiba ju wan lyngba ka Sorkar Jylla Meghalaya ki ju shah pynthut bad shah pynsangeh ha ki bor Sorkar jong ka Assam, hynrei mynta kan nym don shuh shuh kano kano ka jingpynwit ne pynthut ia ki kam pynroi kiba wan lyngba na ka Sorkar Meghalaya, ha kaba ia kane yntip da u Bah Charles Marngar MLA/MDC Mawhati Constituency bad U Abhijit Kro u ba dei u MDC ka Karbi Anglong Autonomous Council, ba dei na ka Chinthong Constituency, West Karbi Anglong u ba la ia don lang ha kane ka Sngi.
U Bah Charles Marngar u la iathuh, na ka bynta ban pynthikna ia ka shong suk shongsain jong ki Nongshong shnong ha ka thain Block 2, u la leit hi da lade la arsien arwat sha Diphu, Karbi Anglong ban ia kynduh ia u CEM ka KAAC u Toliram Ronghang lem bad ki MAC jong KAAC, ban ia kren sngewthuh jingmut bad ban pynthikna ia ka shongsuk shong shngain jong ki Nongshong shnong ha ka thain Block 2.
U la iathuh ruh ba ha ka jingiakren la ia sngewthuh jingmut lang ba nangne shakhmat kan nym don shuh kano kano ka jingpynthut ha ka imlang ka sahlang ha katei ka thain bad la ia ia mynjur lang ruh, ba ia ki kam pynroi lane ki Scheme kiba wan na ka liang ka Sorkar Meghalaya ne naka Sorkar Assam kan nym don shuh shuh kano kano ka jingpynwit pynthut da kaba ia tip lang na baroh arliang mamla kumba la ia kut.
Ia kane la pynthikna bad pynskhem shuh shuh ia katei kaba la pynpaw da u Bah Charles Marngar, ka dei ruh hadien ba la ai jingkren da u Abhijit Kro MAC jong ka KAAC na Chinthong Constiyuency u ba la ia don ban sakhi lang ha katei ka jingialang.
Ha kane ka sngi, na ka liang ki Nongialam shnong bad ki Nonghikai Skul haba kren sha ki Ladpathai khubor ki la pynpaw ia ka jingkmen bad ka jingsngewnguh ia u MLA/MDC u Jong ki, na ka bynta ki kam pynroi kiba u la lah ban wanrah bad kawei kaba ki la pynpaw ia ka jingsngewkmen kaba khraw, halor ka jinglah ban pynthikna ia ka shongsuk shongsain ka jong ki, kaba ki la ong ba kane ka dei ka sien ba nyngkong ba ki ioh ia u Nongmihkhmat u ba lah ban wanrah ia ki kam pynroi bad ha kajuh ka por ia ka jingpynthikna ia ka shongsuk shongsain jong ki Nongshong Shnong ha ka Thain Block 2.
