Ka Phlim Rapture kaba dei kaba phlim ba pawnam jong u Dominic Megam Sangma na Ri Lum Garo kaba la pyni ruh ha kylleng sawdong ka pyrthei bad ioh pdiang ruh shibun ki khusnam, shen yn sdang ban pyni noh haka jylla lajong ha nongbah Shillong bala wanrah da ka tnad Arts and Culture, ka sorkar Meghalaya bad ka Fraternity Art Cine Entertainment Shillong (FACES) naduh ka 7 tarik haduh 11 tarik Naiwieng 2024 ha Soso Tham Auditorium Shillong.
Katei ka jingpyni ïa katei ka phlim ba pawnam jong u Dominic Sangma kan long man ka sngi haka por 12:15, 2:40 bad 5:15 janmiet.
Kum ban shu kdew hangne ka phlim Rapture ka dei kaba la paw bad ithuh ha kylleng ka pyrthei halor ka jingtbit ka khana jong katei ka phlim bad ka rukom pynwan dur bad dang shen la pyni ruh ha kumba 150 tylli ki jaka pyni phlim ha ka ri France, bad dei ha kane ka kynti ba mynta ba ki paidbah ka nongbah Shillong kila lah ban sakhi ïa katei ka phlim.
Ka Phlim Rapture ka dei ruh kaba la ioh nam kum ka Best Cinematography haka 7th Malaysian International Film Festival 2024 bad ‘Best Director Critic Choice’ ha ka Melbourne Indian Film Festival 2024.
Ki tiket kin sa mih shen ban die lypa, ban ailad kloi ïa ki nongpeitkai ban ïoh ïa ki jaka shong jong ki na ka bynta ban sakhi ïa katei ka phlim kaba la khmih lynti bha. Ia ki jingtip ba bniah ha kaba iadei bad ka jingdon tiket yn sa pynbna shen.
Kane ka jingpyni phlim ka long shi bynta jong ka jingthmu jong ka tnad Art and Culture ban kyrshan bad kyntiew ïa ka jingshna phlim tynrai, katba ka FACES ka dang iai bteng ban wanrah ïa ki phlim sha ki nongpeitkai jong ka nongbah Shillong.
