Ka St Anthony’s College, Shillong, da ka jingsngewsarong mynta ka sngi ka la pynlong ia ka prokram ban pynkup burom kyrpang ia ka samla Angelia N Marwein, kaba dei ka samla kaba la pyndep ia ka jingpule ha ka kyrdan MA, Political Science na ka College bad kaban sa mihkhmat ia ka jylla Meghalaya ban iakhun ia ka jingiakop thei bhabriew Femina Miss India 2024.
Ha kane ka prokram mynta ka sngi, la wan ban iadon ryngkat da ki nonghikai jong ka College ki samla pule bad ruh ki nongshah khot sngewbha ban rakhe pyndonburom ia ka jingjop bad u synniang jong ka samla Angelia N Marwein.
U Principal jong ka College, u Fr Arcadius Puwein, SDB, PhD, haba ai jingkren ha kane ka sngi, u la ai ia ka jingiaroh sha ka jingiaid lynti jong ka samla Angelia N Marwein da kaba ong ba kane ka samla kamdei satia tang kaba minot bad stad ha ka jingpule, hynrei kaba noh synniang ruh shibun sha ka kam imlang sahlang, khamtam ha kaba iadei bad ka jingiakhun ia ka hok jong ki kynthei.
“Ngi dap da ka jingsngewsarong ba ka samla Angelia N Marwein kan mihkhmat ia ka jylla Meghalaya ban iashim bynta ha katei ka lympung iakop thei bhabriew Femina Miss India 2024, bad ngi dap da ka jingkyrmem kaba skhem ba kan wanrah ia ka nam ka burom ia ka jylla bad ka college ruh kumjuh” la ong u Fr. Arcadius Puwein.
Na ka liang ka samla Angelia N Marwein, ka la pynpaw ia ka jingsngewnguh sha ka St. Anthony’s College halor ka jingai jingkyrshan ba radbah ha ka jingiaid lynti ka jongka, da kaba ong ba ki jinghikai bad ki jingshem kiba ka la ioh lyngba ka St. Anthony’s College ka pynlong iaka kumba ka long mynta bad pynpaw ruh ia ka jingsngewburom ban ioh ia ka lad ban mihkhmat ia ka jylla bad rah ia ka nam jong kane ka jaka pule ban iakhun ia ka Femina Miss India, 2024.
