Guwahati, Jymmang 14: Ki pulit jong ka nongbah Guwahati hadien ka jingtohkit kaba la jur kaba la pynlong ha kine ki ar taiew tam, ki la lap biang ia ki mar kiba la jahrngai ba la shong dor kumba T. 43 lak ryngkat bad kawei ka trok kaba don ia u registration number AS12AC0874 katba ka dang thmu ban leit pynhap ia kitei ki mar sha Silchar na ka nongbah Guwahati myn ha ka 28 tarik jong u bnai Iaiong, 2025.
Katkum ka tyllong khubor na ki pulit, la iathuh ba tang mar ia ioh jingujor halor katei ka jingjia kaba la kynnoh donkti da u nongniah katei ka trok lem bad ka kynhun, ki pulit ki la pynlong ka jingtohkit kaba jur bad ha kaba sdang la ioh ban kem shwa ia arngut na Khanapara, ki ba la suba rah bor ia katei ka trok, ia kiba la tip kyrteng kum u Ekram Hussain ba khot sin ruh kum u Imran, 22 snem ka rta lem bad u Hafizur Miya, 27 snem ka rta.
Hadien ka jingtohkit bad lyngba ka jingphla jong kitei ki ar ngut, ki pulit ki la pynlong ia ka jingkhynra sa ha ki thain Barpeta bad ioh ban kem sa ar ngut kiwei de kiba la suba donkti lang ha katei ka kam, ia kiba la tip kyrteng kum u Babul Hoque, 27 snem ka rta bad u Jiyarul Islam, 29 snem ka rta.
Shuh shuh na ka jingbuddien bad ka jingtohkit, ki pulit ki la ioh biang ia kitei ki mar kiba la jahrngai na kawei ka jaka buh tiar kaba don ha nongbah Shillong ia kaba la khmih da u Rakesh Kumar Mahato, 33 snem ka rta. Ki mar kiba ki bor pulit kila lap biang ha kane ka jingkhynra, ki kynthup ia 3 tylli ki klong kiba ngiam 210 litar, 6 tylli ki pangkha jongka kompani Crompton, 283 synduk ki tiar jong ka kompani Marico, 50 borti ka Lubricant Urea, 12 tylli ki jainphong, 2 synduk ki tiar ilektrik, 3 synduk ki tiar ka kompani Dabur, 67 synduk ka Colgate, 5 synduk ki tiar ka kompani 3M bad 5 synduk ki jingdih jong ka umsoh Real Juice.
Ki bor pulit kila iathuh ruh ba ia katei ka trok kaba la jah naduh ka 28 tarik u bnai Iaiong, 2025, la lap hajan jong ka jaka khrong khajna ka National Highway Authority of India (NHAI) kaba don ha Ialong Jowai kaba la iehnoh da ki runar.
Ha kaba iadei bad kane ka jingjia, ki bor pulit ka nongbah Guwahati, kila kem noh ia baroh san ngut kitei ki briew kiba la suba donkti halor kane ka kam tuh kam thiem bad ban pynngat iaki katkum ki kyndon jong ka ain.
