Nongpoh, Jymmang 27: Haka sien kaba nyngkong eh, palat 400 ngut ki shipai naki 12 tylli ki ri kiba iadei paralok bad ka India, kila wan ban iashim bynta haka jingkilanmet kaba la ai kyrteng PRAGATI 2026 kaba la pynlong ka ktem shipai Umroi kum shi bynta ban wanrah iaka jingshngain, ka shongsuk shongsain bad ka jingiatreilang kaba iajan. Kane ka jingkilanmet kaba la sdang naduh ka 20 tarik u Jymmang kan neh tad haduh ka taiew ba nyngkong jong u bnai Jylliew.
Ki 12 tylli ki ri kiba la wan ban iashim bynta ha kane ka jingkilanmet PRAGATI 2026 ki kynthup naduh ka ri
Bhutan, Cambodia, Indonesia, Laos, Malaysia, Maldives, Myanmar, Nepal, Philippines, Seychelles, Sri Lanka lem bad ka ri Vietnam.
La pynlong da ka mynsiem jongka jinglong ia ryngkat, ka jingiadei paralok bad ka jingburom kylliang, kane ka jingkilanmet kala ai rynsan iah shipai kiba wan ia shim bynta ba kin ioh iaka jinghikai lang kumjuh, ba ia ai buit mar kylliang bad pynkhlain shuh shuh iaka jingtreikam ha ki khep kiba hap hapdeng ki bun tylli ki ri. Kawei naka bynta ba kongsan jong kane ka jingkilanmet kadei lyngba ka jingthaw ia ki kynhun kiba la khleh lang da ki shipai na baroh 12 tylli ki ri kiba la wan ban ia shim bynta.
Ha kine kai lai sngi kiba lah dep, kitei ki kynhun shipai ki la ioh iaki jinghikai haki bynta kiba kong lum bad ki khlaw ki btap, ka jingkiew iaki mawsiang, ka jingiasiat ha ki khlaw ki btap, ka jingiakop siat iaki snioer bad AK-203 nalor kiwei kiwei de ki jinghikai pyntbit kiba kyrpang.
Ha kajuh ka por, kane ka jingkilanmet ka phai khnat kyrpang ruh ha kaba iadei bad ka jingiajan para shipai lyngba ki kam ialehkai kum ka Basketball, Volleyball, ka jingiatan tyllai bad kiwei kiwei de nalor ka jingiamir jingmut kylliang ban wanrah iaka jingshanniah bad ka jingiatreilang kum ka kynhun.
Ka jingkilanmet PRAGATI 2026 kan iai bteng ban pynkhlain iaka jinglong pynkhreh lypa, ban pyniajan khambha iaka jingiadei hapdeng ki para shipai na kawei ka ri sha kawei pat bad ka pyn-i ruh iaka jinglong lakloi jong kitei ki ri kiba wan iashim bynta ban iatreilang ryngkat ryngkat na ka bynta ban wanrah iaka shongsuk shongsain lyngba kiba kum kine ki jait jingkilanmet ban ia ai jingmut kylliang kylliang.
Sa Peit Ruh
