Khanapara, Risaw 24: Uwei na u kynja jingthung ba phylla bad uba dei u kynja syntiew la lap thymmai da u Scientist ka USTM, ha kaba utei u jaid syntiew ne jingthung ba phylla la tip kum u ‘Begonia neisti B. Hajong, N.Bhat & P.Bharali’, ha kaba la lap ha ki bynta jong ka them wah Dibang ha ka jylla Arunachal Pradesh.
Kane ka jinglap ia une kynja jingthung ba long syntiew la lap ha ka jingwad bniah da u Dr. Nazir Ahmad Bhat, Assistant Professor ka University of Science and Technology Meghalaya (USTM) bad ryngkat ka jingwad bniah lang bad ki riew shemphang ba kynthup ia u Bipankar Hajong, Ph.D. Scholar ka CSIR-North East Institute of Science and Technology (CSIR-NEIST), bad u Dr. Pankaj Bharali, Senior Scientist ka CSIR-NEIST, Jorhat.
Ha kaba ia dei bad kane ka jinglap ia une u kynja jingthung ba thymmai, u Dr. Nazir Ahmad Bhat u la ong, u Begonia nesisti u dei u kynja jingthung ba long kyrpang bad u don ka jingiapher ha ki sla ba don ia ka rong ba ia khleh lang ka rong rupa bad rong lieh. Ka jinglong kyrpang une u jaid jingthung ki kynthup ia ka jingdon ki sla ba heh bad ki dak lieh ha une u jingthung. Lah ruh ban tip shi bynta na ka kynhun kita ki jaid jingthung ba la tip kum ki ‘Begonia genus’. La lap ruh ia kine ki jaid jingthung ha ki sharing lum bad ha ki bynta jong ka surok hapdeng ka Hunli bad Anini, b aune u syntiew u phuh ha ki bynta jong u bnai Naiweing haduh u bnai Kyllalyngkot.
La pynthikna ruh ia kane ka jinglap ia une u kynja syntiew ne kynja jingthung ba phylla da kaba ki riew wad bniah ki la pyndonkam da kito ki jingstad ba thymmai ba la tip kum ka ‘advanced molecular phylogenetic analysis bad khamtam lyngba katad ka jingstad ba la tu ‘ITS2 marker’. Kane ka jinglong kyrpang jong ka jingwad bniah la pynpaw ruh ba une u jaid jingthung u don ka jingiadei ne ka jingiajan bad uta u jaid jingthung ba la tip kum u ‘Begonia’ ba la ju lap ha ki bynta ka dewbah ka Indian Subcontinent. Ia kane ka jingwad bniah la pynlait ruh ha ka Nordic Journal of Botany (John Wiley & Sons Ltd), ba la pynshia bniah ruh halro kine ki jaid jingthung bad ka rukom long ka rukom man jongki.
Nalor ka jinglap kane ka kynhun Scientiest, u Begonia neisti la pynhap ha ka kyrdan Data Deficient (DD), kaba dei katkum ka kaipod ka IUCN Red List criteria. La ong ruh ka jingdang pynheh ia ka surok kane ka wan rah jingma ia ka jingduhjaid une u jaid jingthung bad la donkam bha ban sumar ne ban pynneh pynsah. Kane ka jinglap ia une kynja syntiew ka pynpaw ruh sha ka pyrthei ba ka Arunachal Pradesh ka long kaba riewspah bha ha ka jingdon jingeh jong ki kynja jingthung bapher bapher bad ruh la donkam ban dang pynpaw pyrthei ne pynneh pynsah ia kitei ki jaid jingthung ba kyrpang bad ba phylla.
