Khliehriat, Jymmang 21: Ki paidbah bad ki seng kiba kyrshan ia ka Shree Cement Limited ban pynlong ia ka Public hearing lashai ka sngi ka 22 tarik u Jymmang 2026 ki la dawa mardor na ka sorkar bad ka bor District ban pynbiang ia ki bor pahara ha katei ka Public hearing khang ban iada na ki riew shim kabu kiba thmu ban pynthud ia katei ka Public Hearing.
Ki ar tylli ki seng ba kynthup ia ka East Jaintia People United Front bad ka East Jaintia Small Minors and trader Association ryngkat ki paidbah ba kyrshan ia ka Shree Cement Limited ha ka lama ka United Joint Action Committee ki la rai beit ban kyrshan na ka bynta ban pynlong ia ka Public Hearing ka Shree Cement Limited kumba la buh por da ka sorkar.
Kumba la sakhi mynta ka sngi, kine ki kynhun kiba kyrshan ia ka Public hearing ka Shree Cement ki la mih ban iaid paidbah ban rah ia ki placard, ki banner bad ryngkat ki jingthoh ban dawa ia ka hok bad ki la pynpaw ruh ia ka jingkyrshan kaba radbah ia ka Shree Cement Limited.
Sa Pule Ruh | Yn Pynlong Jingïalang Ka Association Ban Ïa Kren Ïaki Jingeh Ki Contractor Ha Ri Bhoi
Ka la don ruh ka jingpyrshang ban rung jubor sha ka ophis u Deputy Commissioner ym tang naka liang ka kynhun ba kyrshan ia ka Shree Cement bad na ka liang ka kynhun ba pyrshah ruh ki la iathur lang sha ka ophis u Deputy Commissioner haduh ba la mih ka huri hura kaba jur hadien ba la khang lad da ki bor Pulit.
Haba kren sha ki lad pathai khubor, u Chairman ka United Joint Action Committee u Bah Daowanhi Rymbai, u la ong ba ki pynrem jur ia ki bor pulit kiba la khang lynti ia ki ban rung sh ka ophis u DC haduh ba la don kiba la mynsaw bad u la dawa ruh ba dei ban siew bai lutksan ia kiba mynsaw.
Nalor kata, u la ong ruh ba ka kynhun kaba kyrshan ki don ia ka hok ban kyrshan ia ka Shree Cement bad ki la shah khang lynti pynban ha ki bor pulit bad hadien ba la ioh rung sha ka phis u DC ki la pynpaw ia la ka Nongrim ba ki kyrshan bad ki dawa jur na ka bor synshar District ban sngap lem ia ka sur jong ki paidbah babun balang.
Shuh shuh, u la bynrap ruh ba na ka liang ka kynhun ba kyrshan ia ka Shree Cement ka kyrpad jur ia ka sorkar bad ka bor synshar District ba kin pynbiang pura ia ki bor pahara na ka bynta ka public hearing ka ban long lashai, khnang ban lah ban iada na ki riew shim kabu kiba thmu ban pynthud ia kane ka Public Hearing ba la kyrshan da ki paidbah.
Sa Peit Ruh
