Mairang, Risaw 21: Ban kynmaw burom ia la lyngkhuh sngi iap ba 16 snem u (L) Skendrowell Syiemlieh kum u Kaitor lane u nongrwai ba pawnam ka jaid bynriew, uba dei ruh u nongrwai ba man ka por ha ka All India Radio, kaba u la ioh jingieit na ki ba bun ki paidbah lyngba ki Sur tem bad ki sur Jingrwai ki jong u, ka kur Syiemlieh kum ka dak ban pynsah jingkynmaw ia une u Kaitor ba paw ka la tei da u motdur ha ka shnong Umthied Bynther (Sylleibah)kaba dei ka shnong trai jong u Bah Skendrowell.
Na ka liang ka kur Syiemlieh ka la plie paidbah ruh ia une u Motdur mynta ka sngi ka 21 tarik u Risaw 2024 da uChairman ka Meghalaya state planing Board bad uba dei ruh u MLA ka Mairang, u bah Metbah Lyngdoh kum u kongsan ha ka jingiadon ryngkat lang u paiem PM Syiemlieh, u Syiem ka Hima Nongkhlaw, I kurim ki khun ki ksiew u (L)Skendrowell, Ki rangbah ka kur Syiemlieh,u sordar ka shnong umthied Bynther bad kiwei kiba la shah khot sngewbha.
Haba kren ha kane ka sngi kum u kongsan u Bah Metbah Lyngdoh, ula pynpaw ia ka jingsngew kmen ban ioh plie noh ia u mawmot sah kynmaw jong I bah Skendrowell Syiemlieh, kaba dei ruh ka jingangnud jong u la slem bah ban leh ei ei ia une u rangbah bad kane ka la urlong ban plie noh ia u motdur jong u Bah Skendrowell Syiemlieh ka jingkhublei kaba kyrpang ka leit sha u Myntri rangbah ka jylla uba la synniang ban mang tyngka na ka bynta ban tei ia u motdur jong u ha katei ka shnong.
U la ong ruh, ” U (L) Skendrowell Syiemlieh um dei satia tang u kaitor lane u nongrwai bad u dei ruh u nongiathuh khana uba pynwan dur ia ki jingjia, ki jinglong jingman bad uba batai ia ka lawei ka lashai kata dei u bah Skendrowell Syiemlieh.” Ong u Bah Mentbah.
Lyngba jong kane ka sngi, u Bah Metbah Lyngdoh la kyntu ruh ia ka ing ka sem bad ia ka kur Syiemlieh ba lada ka long kaba lah ba ki dei ban pynpaw iaka nam jong u, katkum ka juk stad mynta (Digitalized) lyngba ki kor ki bor (Technology) ia ki jingrwai babun jaid jong I, khnang ba kane kan long u synniang ne ka jingmyntoi ia kiba bun ki nongsngap ia kita ki jingwai ba kit jingmut bad ba don dor jong I.
