Nongpoh, Nohprah 11: Ki nongialam ka Dorbar Shnong Saiden ha ryngkat ki Paidbah Nongshong Shnong ka Saiden ha Nongpoh, ki la pynpaw ia ka jingkmen kaba khraw kumjuh ruh ia ka jingsngewnguh ia ka jinglong ba la kloi jong u Myntri Rangbah ka Jylla Meghalaya u Conrad K Sangma halor ka jingkular ka jong u ban pynurlong ia ki katto katne ki jingdonkam ba kongsan jong ka shnong Saiden.

Ia kane ki nongialam shnong ba la lamkhmat da u Rangbah Shnong u Bah EJ Myrthong lem u Secretary Shnong Bah Shemphang Kharlukhi, ha ka jingiadonlang ki nongialam Seng Longkmie bad Seng Samla ka Shnong ki la ai khublei kyrpang ia u Myntri Rangbah ka jylla u Conrad K Sangma halor ka jingpynlait por ka jong u ban ia kynduh ia ki bad ruh ban pdiang ia ka dorkhas ba kum ka shnong ka la pynkhreh ban aiti ha ka jingwan hiar jong u sha Ri Bhoi District ban leit shimbynta ha kawei ka programme paidbah ba la pynlong ha ka shnong Pahamsyiem.

Lah ban kdew, ba u Conrad K Sangma kum u Myntri Rangbah ka Jylla Meghalaya, lem bad u Bah Wailadmi Shylla, Myntri ka sorkar MDA II, ha ka 11 tarik Nohprah ki la hiar da ka helicopter ha ka madan football jong ka Shnong Saiden, ban leit shimbynta ha ka programme ha ka shnong Pahamsyiem, bad na ka liang ki nongialam Shnong hadien ka jingiaphylliew jingmut bad u MLA ka Umsning Constituency u Dr. Celestine Lyngdoh ki la ioh ban iakynduh markhmat bad ban pdiang burom ia u Myntri Rangbah bad ruh ban aiti ia ka dorkhas ba la kdew ia ki jingdonkam ba kongsan jong ka Dorbar Shnong.

Kaba la kham pynkmen shikatdei eh ia ki nongialam Shnong lem bad ki Paidbah nongshong shnong ka Saiden, ka long ba u Myntri Rangbah ka Jylla wat hapdeng ka jingiaid lynti jong u lyngba ka shnong Saiden, u la pdiang sngewbha ia ka dorkhas bad ban ai syndon ia ka jingkular ba un pynurlong ia ki jingdonkam jong ka shnong kiba kynthup ia ka jingtei ia ka kynroh (Fencing of the football ground) bad ruh ia ka jaka leit bar paidbah (Public Toilet).

Na ka liang ka Dorbar Shnong Saiden, ka la pynpaw ruh ia ka jingsngewnguh kaba khraw ia ka jinglong sngewrit jong u Myntri Rangbah ka Jylla bad ka jinglong kaba kloi jong u ban sngap lem ia ki jingkyrpad jong u paidbah da kaba pdiang bad kular ban pynurlong ia ki jingdonkam jong ka shnong.