Nongpoh, Jylliew 16: Ka dorbar Shnong Umshangling ryngkat ka Synjuk ki phra shnong mynta ka sngi ki la rai ban shah biang ban leit bret ïa kii jaboh kiba mih na ki shnong ba hap ha ka sor Nongpoh, kaba dei hadien ka jingwan jurip bad ka jingïashong pyrkhat ba la rai ban pynurlong ïa ki 14 tylli ki mat jingdawa ba la buh d ka Dorbar Shnong Umshangling.
Kum ban pynkynmaw, la 5 sngi kynthih mynta ki shnong ba hap ha ka sor Nongpoh ki la ïa kynduh jingeh na ka daw ka jingbym ioh shuh ba leit bret ñiut ha katei ka jaka, ba ka shnong ka la khang ban leit bret, hynrei mynta ka sngi da ka jingleit jurip bad ka jingïashong pyrkhat la rai ban shah biang ban leit bret niut ba ka bor district ryngkat u MLA bad ki bor ba dei peit ki la rai ban pynurlong kumba la dawa da ka Dorbar Shnong Umshangling.
Shwa ban ïa kren ne ïa thir halor ka jingeh katei ka shnong na ka jingbret pathar ïa ki jaboh ba la pynsma ingtung ïa ka shnong, u MLA ka Nongpoh Constituency u Bah Myaral Born Syiem, u Deputy Commissioner ka Ri Bhoi, Abhliash Baranwal, bad kynthup ki nongmihkhmat na ka tnad Urban, NongpohTown Committee, ki Rangbah shnong ki la leit ïa kynduh la leit jurip lang halor ka jinglong jingnam katei ka jaka theh niut bad hadien kata ki sa ïa shong pyrkhat ban ïa kren pynbeit ba ka Shnong ka la ai lad biang ban leit bret jaboh da kaba buh haduh 14 tylli ki mat jingdawa ba dei ban punurlong shuwa ban leit bret ïa ki niut.
Kumba la ïathuh da u Bah Vincent Sohwkhwai, Secretary Shnong, ki mat ba kham hakhmat ba la buh ba dei ban leh shuwa ka long ban pynbha noh mardor ïa ka surok ba pynïasoh sha katei ka jaka theh niut, ban pynkhuid shuwa ïa kitei ki jaboh ba la bret pathar bad ruh ban buh 2 ngut ki nongap pyrmat ban peit haba wan bret ïa ki jaboh nalor kiwei kiwei ki mad jingdawa.
Haba kren ruh sha ki lad pathai khubor, u Bah Mayral Born Syiem, MLA ka Nongpoh, u la ïathuh ba lyngba kane ka jingleit jurip bad ka jingïashong pyrkhat mynta ka sngi ha Conference Hall ka ophis u Deputy Commissioner, ka Dorbar Shnong Umshangling ka la ailad biang ïa ki shnong na ka sor Nongpoh ban leit bret niut, hadien ba la ïa kren ban shim khia halor ki mad jingdawa ba la buh da ka shnong kum ha ka ban siang rong ïa ka surok, ban buh da ka khyrdop ban thung briew ban peit pyrman ïa ka jingwan bret jaboh sha katei ka jaka theh ñiut kaba don ha ka shnong Umshaling.
U la ong ruh kane kam dei ka kam kaba thymmai bad ka dei ka kam kaba la rim bha ba ngi hap ban ïa kren ne ïa thir sani bad kum ka Shnong Umshangling ka don hi ban khang ban wan bret niut, namar ka jingbret pathar ïa ki niut ka la ktah ïa ki paidbah nongshong shnong.
Shuh shuh, u la ong ruh ba lyngba kane ka jingïashong pyrkhat la lah ban ïa kren sani ha kaba ki mat jingdawa ka shnong kin sa pynurlong bad ha kajuh ka por kan sa don ruh ka Monitoring Committee ba khleh da u DC kum u Chairman na ka bynta ban peit ban khmih bha ba ka jingbret jaboh kam dei ban ktah ïa ka koit ka khiah ki paidbah nongshong shnong.
Khatduh eh, u la bynrap ruh da kaba ong, kaei ka rai ba la mih na kane ka jingïalang ngin sa shim khia ban pynurlong bad u la pynthikna ruh ba ka shnong Umshangling ruh ka la pdiang ban ailad biang ban wan bret ïa ki jaboh, hadien ba la shim rai ban pyndep ne pynurlong kumba la dawa da ka Dorbar Shnong, u la bynrap.
