Shillong, Naitung 10: U Bah Sadon Blah u ba dei ruh u President ba rangbah Ka Hynñiewtrep National Youth Front (HNYF) Sengkmie ha ryngkat ka HNYF Jaiñtia Hills bad ka Hynñiewtrep Border Dispute Redressal Forum (HBDRF), mynta ka sngi ka 10 tarik u bnai Naitung, 2025, ka la leit ban ïakynduh ïa u Chief Executive Member (CEM) ka Jaiñtia Hills Autonomous District Council (JHADC), u Ma Thombor Shiwat ban buddien halor ka jinglong-jingman jong ki shnong kiba don ha khappud khamtam hapoh ka Block-1 bad ka jingithuh noh ka Sorkar Meghalaya ïa ki paradoh kiba don ha khappud bad kumjuh ruh halor ka jingïai bteng ka jingshah banbeiñ jong ki paradoh-parasnam kiba don ha kitei ki thaiñ.
Na ka liang u President u Bah Sadon Blah ula ong ba ha ki 2 snem mynshwa, ka JHADC kala ithuh ïa ki Shnong ha khappud lyngba ki Syrnod bad ka jing pynkhie im biang ka JHADC ïa ka Elaka kaba la ïap noh la kumba 50-60 mynta, hynrei naka liang ka Sorkar pat kam shym treh ban ithuh bad kane ka la buh jingeh ïa ki nongshong shnong jong ka thaiñ ha ka liang ki kam pynroi-pynpar, ka pule-puthi bad wat ka EPIC ruh kim lah ban ïoh bad baroh ki jingdonkam bad jingmyntoi kiba dei ban ïoh lyngba ka Sorkar Pdeng bad Sorkar Jylla ruh kim ïohpdiang satia. Kaba la ioh leh mon pat da ki riew shim kabu ki karbi ban pyntieng pynsmiej iaki paidbah katei ka thain.
Shuh shuh u Bah Sadon Blah u la buh da ka jingmaham ba lada dang don kino kino ki briew lane kino kino ki seng na Karbi Anglong ki ba dang iai bteng ban pyntieng ban byrngem byrsit iaki paradoh parasnam ki ba shong ha Block 1 bad 2 kin sa ioh jing sngeng da ka ba tyngeh.
Hadien ba la dep ia kynduh ia u CEM bad ia U Deputy CEM ka JHADC, naka liang u Bah Chandame Sungoh uba dei u Chairman ka Forum, ula ong ba ka jingdawa jong kine ki ar kynhun ka long ba ki la pan ïa ki jingthoh na ka District Council halor ka jingpynim biang ïa ka Elaka bad ban ai Syrnod ïa u Acting Doloi bad ki Waheh Shnong ha kaba naka liang ka District Council kala kular ban ai bad pynbiang ïa ki kot ki sla kiba donkam.
