Nongpoh, Risaw 10: Ka Khasi Student Union, North Khasi Hills District Unit mynta ka sngi ka la byrngem syndon ban khang khyrdep ia ka Toll Plaza ne ka khyrdop khrong khajana ka NHAI kaba don ha Pahammawleiñ, lada ki jingdawa kim urlong na ka bynta ka jingshngain ki paidbah ha ka leit ka wan lyngba ka surokbah National Highway-6 ha Ri Bhoi.
Kane ka jingbyrngem ka seng KSU North Khasi Hills District Unit ban khang noh ia katei ka jaka lum khajna ka NHAI ha Pahammawlein, ka dei hadien ba ki la wan ban kynduh ia u deputy commissioner ka Ri Bhoi ha ka ophis treikam jongu, ha kaba ki la aiti ruh ia ka dorkhas halor ki mat jingdawa ba la buh da ka seng, kiba dei halor ka jingdonkam ban pynbit pynbiang ia ki jingdonkam ki paidbah ha kane ka surokbah ha Ri Bhoi.
Kumba la pynpaw da u President ka KSU North Khasi Hills District Unit u Samla Ferdynald Kharkamni, la ong ba ki la ai por ia ka NHAI hapoh ka shi bnai ba dei ban leh ei ei halor kitei ki jingdawa bad lada kim urlong ka seng ka la bynngem syndon ban khang ia katei ka khyrdop lum khajna ka NHAI kaba don ha Pahammawlein ha Ri Bhoi.
Ki katto katne ki jngdawa ba la buh da KSU ki kynthup floodlight lane ban buh bor jingshai ha ki bynta jong ka Downgate, ha jan Alpha skul bad ha jan Bethany, ban buh kita ki zebra crossing, ban pynbha ia ki jaka ba sniew, ki nala um ba biang bad kiwei kiwei ki lad jingiada ban shngain ki paidbah ba leit ba wan. Nalor kata ki la pynkynmaw ruh kum ka jingkieng iaid kjat ba la mang haduh 7 tylli ha kane ka surok bah ha Ri Bhoi.
La pynpaw ruh da u President ba ia kine ki mad jingdawa la dep ia kren naduh u snem 2016 ba ka NHAI ka hap ban pynbiang ia ki jingduna kiba don ha kane ka surokbah bad ia kane ka mat la phah ruh sha u Myntri ka sorkar pdeng ha katei ka por bad ka long pat kaba sngewsih haduh mynta ym shym la don kawei ruh kaba urlong.
Namar kata, na ka liang ka seng ka la dawa jur ia u Deputy Commissioner ruh ba un ia kren thikna sha ka sorkar jylla bad ruh sha ka NHAI halor kitei ki mat jingdawa bad lada kine ki jingdawa kim urlong ka seng ka la rai ban khang shuwa noh ia katei ka khyrdop lum khajna ka NHAI ha Pahammawlein, namar kam don jingmut ban lum khajna na ki kali paidbah katba ka jingdon kane ka surokbah ka buh jingma pynban ia ki paidbah lada ym lah ban pynurlong ia kitei ki jingdawa ba la buh da ka seng, u la bynrap.