Ki pulit jong ka North Garo Hills District hynnin ka sngi, ki la ioh ban kem sa lai ngut ki nonglute kiba dei na ka jylla jylla Assam kiba donkti ia ban lute naphang ia ki paidbah da kaba pynap da ki ktang suloi ha ka janmiet jong ka 18 tarik u bnai Jylliew, 2024.
Katkum ka kyrwoh na u Superintendent of Police ka North Garo Hills District, u Pawar Swapnil Vansantrao, la iathuh ba ha ka janmiet jong ka 18 tarik u bnai Jylliew, 2024, kumba saw ngut ki nonglute ki bym lah satia ban ithuh durkhmat, kiba la wan lyngba ar tylli ki kali ar shaka kiba don ia ka registration number AS 18J 0181 (Scooty) bad AS 18E 7925 (Pulsar), ki la ioh ban lute haduh T. 80 hajar, ar tylli ki mobile phone bad ki kot ki sla ong ki paidbah katei ka thain.
Utei u heh pulit, u la iathuh ruh ba ha katei kajuh ka janmiet, ki paidbah nongshong shnong jong ka Beldongpara ki la ioh ban bat ia kitei ki ar tylli ki kali ar shaka, katba kitei ki runar pat ki la ioh ban phet krad ialade.
U la pyntip ruh ba ha ka jingthwet ia kitei ki nonglute, ki pulit ha ka 18 tarik jong u bnai Jylliew, 2024 ki la ioh shwa ban kem ia uwei na kitei kiba donkti, ia uba la tip kyrteng kum u Sunil Boro, 33 snem ka rta na ka shnong Upper Borgum jong ka Dudhnoi District ka jylla Assam ryngkat bad katei ka kali ar shaka (AS 18J 0181) kaba la pyndonkam ha kitei ki kam tuh kam thiem.
La iathuh ba hynnin ka sngi, kata ka 1 tarik jong u bnai Naitung, 2024, sa uwei de u runar na katei ka kynhun, uba la tip kyrteng kum u Turti Basumatary, u la leit ban pyndem ialade hakhmat ki bor pulit ka North Garo Hills District ryngkat bad kawei ka pistol kaba don ar tylli ki kuli. Lyngba ka jingphla une u runar uba la wan pyndem ialade, ki bor pulit ki la ioh ban kem pat sa ia uwei pat u runar, uba la tip kyrteng kum u Sahadev Basumatary ki khappud ka jylla bad Assam hajan Tikrikilla jong ka West Garo Hills District.
Kumba long mynta, na ka liang ki bor pulit kila kurup noh ia kitei ki ar tylli ki kali ar shaka bad kawei ka pistol bad ka jingthwet ban iohkem sa ia uwei de u ba donkti, ia uba la tip kyrteng kum u Kaltu Rabha ka dang iaid shakhmat.
Kum ban shu kdew, dang ha kine ki khyndiat sngi ba lah dep, ka kynhun ba kyrpang jongki pulit jong ka Ri Bhoi District ki la ioh ban kem haduh saw ngut ki nonglute surokbah kiba dei na ka jylla Assam hadien ka jingkthong kaba la long thik kum ha ki phlim bad kaba la pynpar niang khriat ruh ia ki paidbah ka thain Nongpoh bad kaba la poi ruh shaduh u pud ba ki pulit ki hap ban siat ban ioh kem ia kitei ki runar.
