Shillong, Ïaïong 10: Ka Voice of the People Party mynta ka sngi ka 10 tarik u Ïaïong 2026, ka la ïoh ban sieh ïa ka lama ba nyngkong eh ha Rilum Garo ha kaba la ïoh ban thung ïa ka Adhoc Committee jong ka VPP Garo Hills Zone.

Ha ka jingïalang kaba la long mynta ka sngi ha Tura ha ka jingïalam u President Bah Ardent Basaïawmoit la ïadon lang ruh ki riew rangbah, ki samla na ki District bapher bapher ka Garo Hills bad la ïoh ruh ban jied ïa ki Nongkitkam jong ka Adhoc Commiittee kiba kynthup ïa u President u Kronolite Marak, Secretary u Ronald S. Sangma bad kynthup ki EC Member ba la jied ïa u Ryan S. Marak, u Joba Marak, u Tengsim Momin, u Jim Reeves Momin bad u Thinker Marak. Ha kane ka sngi la jied ruh 3 ngut ki Adviser, u Dr. Meril Sangma, u David Ch Marak bad u Ajay M Marak.

Nalor kitei ki nongïalam ka Adhoc Committee, ha kane ka sngi la jied ruh ïa u Adhoc President jong ka Youth Wing ba la jied ïa u Abhi D Sangma bad Secretary ïa u Salchura S Sangma.

U President jong ka Party, u Bah Ardent Miller Basaïawmoit, u la pynpaw ka jingsngewkmen halor ka jingïoh ban thung ïa ka Adhoc Committee jong ka Party ha Garo Hills, kaba ki paidbah na kane ka thaiñ ki la angnud la slem, hynrei ka Party kam shym la leh kyrkieh namar ka kwah ban da pynsngewthuh bad pynngam bha ïa ki nongrim jong ka Party bad khamtam eh ban ïoh ïa ki briew kiba skhem ka nongrim bad kiba lah ban shaniah.

Ha kane ka sngi, la pynlong ruh ïa ka jingpynrung dkhot ha kaba kiba bun ki la pynrung dkhot sha ka Party VPP ryngkat bad ka jingkular ban trei bad pynkhlaiñ bad pynsuh thied ïa ka Party ha Rilum Garo.