Nongpoh, Nailar 25: Ka Confederation of Ri Bhoi People (CoRP) Ri Bhoi Sepngi mynta ka sng ka la mih shakhmat ban pynpaw ia ka jingsngewkhia, kaba dei na ka jingshah ktah ki paidbah ka Ri Bhoi Sepngi kaba dei na ka jinglip bording ba khah khah.
Haba ia kren sha ki lad pathai khubor, u Bah Running Syngkli, u la ong ba kum ka seng kam banse ban mih shakhmat halor kine ki jingeh ba ia kynduh ki paidbah na ka jinglip bording ba khah khah ha katei ka thain Ri Bhoi Sepngi bad kane ka jinglip bording ka la ktah bha naduh ki kam bank, ki kam ophis, ki samla pule bad ha baroh ki bynta ba ha kaen ka juk la hap ban pyndonkam da ka bording ilektrik.
U la ong ruh ba ka seng ka kyrpad iaka tnad MeECL ba kan pyndep noh kham kloi ia ka line thymmai na Mairang bad ruh dei ban peit bha ruh ia ka line kaba wan na Nongpoh, namar kane ka jinglip bording ka la ktah shisha ia ki paidbah.
Shuh shuh, u la ong ruh ba u kyrpad jur ia u MLA ka Jirang ruh kumba u la shim khia ban ia kren halor kitei ki line thymmai ba un ia kren lem sha ka sorkar ban pynsted ia ka kam bad ruh ban ia kren sha ka tnad MeECL. Nalor kata ka seng ka kyrpad ruh ia u Myntri ka tnad bording ba un shim khia lem halor kane ka jingeh ba ia kynduh ki paidbah ha Ri Bhoi Sepngi, u la bynrap.
