Mawsynram, Jymmang 29: Haba ïalap election hynnin ka sngi ha Mawsynram ban pan ka jingkyrshan na ki paidbah ba kin pynjop lem ha kane ka MP election shiteng samoi  na ka Shillong Parliamentary Constituency, u Dr. DRL Nonglait u la phla paidbah ba ma u ruh wat la u la poi sha ka kyrdan kum u nonghikai ha skulbah NEHU, hynrei u dei u ba wan na ka longing longsem kaba duk bad bunsien u la hap ban pep skul ban kyrshan ïa lade bad ruh ïa ki para na ka bynta ban ioh jingnang jingstad.

U la ong ruh ha kitei ki por ban pynstad pynnang ïa lade ne ïa ki para ka long kaba shitom bha namar ba ban ka jingduk ka jingkyrduh bad ha kitei ki por kim pat da don kita ki skhim sorkar ban kyrshan ïa ki samla kiba pule.

“ Kum u Rangbah uba la ïaid lyngba shibun ki jingeh ban poi sha ka kyrdan nonghikai ha ka skulbah NEHU, nga shim ïa ka rai ban ïakhun ha kane ka MP election shiteng samoi, dei namar ba u don kata ka jingkitkhlieh kaba khraw ban dang pynbit pynbiang ïa ka pule ka puthi hapoh ka jylla” ong u Dr. Nonglait.

U la ong ïathuh ruh da kaba ong, kum u rangbah uba angnud ban kyntiew ïa ka pule ka puthi, u la don bynta ruh ban seng haduh 3 tylli ki skul ha ka dong ka thain jong u bad ym tang katta u la kyrshan ruh ïa kitei ki skul lyngba ka tulop kaba u ioh kum u nonghikai ha ka skulbah NEHU.

“Tang ka tulop kum u nonghikai ha NEHU kam pat biang pura ban kyrshan ne ban kyntiew ïa ka pule ka puthi ha ka jylla, hynrei lada ki paidbah kin pynjop ïa u kum u MP un lah ban ïasaid ne ban wan rah shibun ka mang tyngka na ka bynta ban dang saindur bad bad ban pynjanai ïa ka pule ka puthi hapoh ka jylla” u la ong.

Shuh shuh, u la ong ruh ba sa tang saw snem un shongthaid noh kum u Nonghikai ha ka skulbah NEHU ha kaba tang ka tulop un nym lah ban thaw pyrthei, hynrei u shim ïa kane ka jingkitkhlieh ban ïakhun ïa kane ka election shiteng samoi ka long ban kren ïa shibun ki mat ki jura kiba ïa dei ban kyntiew ïa ka pule ka puthi naduh ki Lower Primary shaduh ki Higher Secondary bad wat sha ki kyrdan kiba shaneng kaba dei tang lada ki paidbah ki pynkup bor ne jied ïa u kum u MP ban ioh ïasaid ha Parliament, u la bynrap.