Nongpoh, Lber 14: Kawei ka samla ba dang 23 snem ka rta ka la duh ia la ka jingim mynta ka sngi, hadien ba ka Scooty ba ka shong bad la u hymmen ka la ia tyngkhuh bad kawei ka trok kaba la jia mynta ka sngi ha Sumer ba hap ha National Highway-6 ha Ri Bhoi District.

Kane ka Scooty ka don ia u number ML 05 AC 2751 ba la niah da u hymmen jongka u Celestial Hanse (27) bad ka para ba la tip kyrteng kum ka Retina Hanse (23) ka shong nadien ka Scooty bad kaba la duh syndon ia la ka jingim na ka jingjur ka jingmynsaw.

Kine kiba shong ha ka Scooty ki dei na ka Shnong Khamar ha Ri  Bhoi District.

Katei ka trok pat ka don ia u number JK 02 BS 0445 ha kaba ia u driver ka trok la ioh bat da ki Pulit ba la phah lang ruh ban leh ia ka medical examination ha CHC Umsning.

Kumba la iathuh da ki Pulit ka Ri Bhoi la ong ba  katei ka Trok bad ka Scooty ki dang hiar na Shillong sha Nongpoh, hynrei hadien ba la poi ha Sumer ha ki bynta ba dang pyntrei ia ka Western Bypass ki la ngat ia katei ka jingjia ba sngewsih ba katei ka samla 23 snem ka la duh ia ka jingim kumba la pynbna da ki Doctor hadien ba la poi ha CHC Umsning.

La iatruh ba kiba haing ki la kyntait ia ka postmortem examination bad kim don kano kano ka jinsuba sniew kaba dei tang na ka jingiatyngkhuh katei ka Scooty bad ka Trok bad hadien ba la pynlait ia ka postmortem examination bad la ai bor da ka Magistrate la aiti noh ia ka met katei ka samla na bynta ban lehburom khatduh ia ka met ba dang sah jong katei ka samla.