Nongpoh, Naiwieng 25: Namar ka jingkynrei u drok uba la rung sted sha ki shnong ki thaw ka la buh jingma shisha ia kiba bun ki samla kiba lui lui ban ngop ha une u jingdih ba sniew bad na ka daw ka jingbun ki samla kiba la ngop ha u drok ka la pynlong ruh ban mih bun ki kam tuh ki kam thiem ha ki shnong ki thaw.

Kawei na ka jingjia ne ka sakhi ba bun ki nongtuh nongthiem ka la jia ha ka Shnong Jorpul Killing, ha kaba ha ka step pyrngap jong ka sngi U Blei la sakhi ba uwei u runar u la leit ban tuh haduh 3 tylli ki Cylinder Gas na ka jaka sah jong ki samla pule.

La sakhi ruh ia ka jingwan tuh utei u runar ia ki Cylinder Gas lap lyngba ka CCTV kaba la buh ha katei ka ïing bad utei u runar tang shu dep ban tuh ia kitei ki Cylinder Gas u la phet krad noh ia la lade.

Na ka liang u trai katei ka ïing uba la ithuh dur khmat ia utei u runar kumba la lap da ka CCTV, u la leit ban ujor noh da ka ejehar ha ki Pulit ka Khanapara Police Station bad na ka liang ki Pulit ruh ki la shim khia ban tohkit na ka bynta ban ioh kem ia utei u runar.