Nongpoh, Nailar 13: Â Ka jingangnud ki paidbah ka thain Mawhati ban ioh ia ka Doctor ba pura ha PHC Mawhati na ka bynta ban ai jingsumar ia kiba pang ba shitom kan sa urlong noh, namar na ka liang ka sorkar ka la pynmih ia ka order ban wan trei noh ka Doctor ha katei ka PHC ban weng noh ia ka jingeh ki paidbah ba ki mat baroh shi katta khlem da don doctor ha PHC Mawhati.
Ia kane khubor kaba sngewkmen ban ioh noh ia ka Doctor ba pura la pynpaw hi da u MLA ka Mawhati u Bah Charles Marngar uba la pynthikna ba shen ka Doctor MBSS kan sa wan ban trei noh ha katei ka PHC ban shakri ia ki paidbah ha ka pang ka shitom.
Haba kren sha ki nongthoh khubor mynta ka sngi, u Bah Charles Marngar kum u MLA ka Mawhati u la  ong ba kito kiba Doctor kiba la phah wan trei mynshuwa da ka sorkar bad ki khlem wan join trei ka sorkar ka la dep phah da ka show cause notice kiba long katkum ki kyndon jong ka ain.
U la iathuh ruh ba na ka liang ka sorkar bad ma u ruh kum u MLA kim shym la shong kli kti  bad ki la ju buddien na ka por sha ka por na ka bynta ban pynbit pynbiang ia ka jingangnud ki paidbah khamtam ha ka liang ka koit ka khiah.
Shuh shuh, u la iathuh ba ka long ruh ka khubor kaba kmen ia ki paidbah, ha kaba da ka jingshah skhor ka sorkar ia ki jingpynsngew jong u ia ka jingdonkam ki paidbah bad mynta ka Mawhati PHC kan ioh noh ia ka Doctor ba pura bad nalor kata ka sorkar ka la pynmang ruh ia ka song pisa na kabynta ban pynbha ia ki PHC ba kynthup ia ka Umtrai PHC, Mawlasnai PHC bad ka Mawhati PHC, u la bynrap.
Peit ruh:
