Jammu and Kashmir, Jylliew 18: Ha ka jingnang iaid ka jingtohkit halor ka jingjia shah hiar thma kawei ka bus kaba kit ia ki nongleit nongwan (Pilgrims) kaba la jia ha kawei ka surok bah jong ka Reasi, Jammu and Kashmir, ki bor pulit pulit jong ka Jammu and Kashmir ha ka jingtohkit ki la lap ksai ba hashwa ba ki riew kiengatiar kin hiar thma ia kane ka bus, katto katne ngut ki nongniah kali kynthup ia ki kali shimet bad kali kamai, ki la iohi ia ki 2 ne 3 ngut ki riew kiengatiar ba la kiengatiar bha ba ki la ieng harud ka surok bah kiba dang ap ban hiar thma ia ka bus kaba la kit ia ki nongleit nongwan (Pilgrims).
Lah ban kdew, ba kane ka jingjia shah hiar thma kaba shyrkhei jong kawei ka bus kaba la kit nongleit nongwan ha u surok bah jong ka Reasi Jammu and Kashmir, ka la jia ha ka 9 tarik Jylliew, ha kaba 9 ngut ki la shah pyniap bad kumba 41 ngut ki la mynsaw ha kane ka jingshah hiar thma ia ka bus kaba la kit ia ki nongleit pilgrims kiba thmu ban leit sha Mata Vaishno Devi shrine.
La ioh khubor ruh, ba tang hadien shikynta ba la jia ka jingshah hiar thma katei ka bus, ka kynhun jong ki heh pulit jong ka NIA, ba la lamkhmat da u heh pulit ba bat ia ka kyrdan IG, ki la hiar sha katei ka jaka ba la jia ka jingshah hiar thma ha ryngkat ka kynhun forensic jong ka NIA ban lum ia ki sakhi ki satar ban pynkhlain ia ka jingtohkit bad ka jingthwet ia ki riew kiengatiar kiba donkti ha kane ka jinghiar thma ia ka bus.
La iathuh ruh, ba ha kane ka jingtohkit, ki pulit ki la ioh ia ka jingiarap na ki nongniah kali kiba la iohi ia ki riew kiengatiar hashwa katei ka jingjia, bad da ka jingiarap jong u wei u nongniah kali ba la buhrieh ia ka kyrteng la lah ban shna pat ia ka jingdro ia ka dur jong u wei napdeng ki 3 ngut ki riew kiengatiar bad ka jingkhynra ia ki kali ba leit ba wan khamtam ia kito ki kali kiba la iaid lyngba ka surok bah Reasi ha ka 9 tarik Jylliew la nang pynjur da ki pulit, iathuh u heh pulit ka MHA.
Na ka liang ki bor pulit, kiba la ioh jingiarap na u wei u dribar kiba la lah ban shna ia ka jingdro dur (Sketch) ia u wei napdeng ki 3 ngut ki riew kieng atiar ia kaba la pynsaphriang sha baroh ki Police Station ka Jammu and Kashmir bad sha ki Central Intelligence Agencies ban thwet tyngeh ia u ne u riew kiengatiar bad kiwei kiwei kiba la donkti ban hiar thma ia ka bus kaba la kit ia ki nongleit pilgrims ha Reasi, Jammu and Kashmir.
“Ngi suba jur, ba kine ki riew kiengatiar kiba la pynbeit bha hashwa ban hiar thma ia kane ka bus, ki lah ban rung tuh shapoh ka Ri India lyngba ka Line of Control bad la suba jur ba ki dang rieh tngen ialade ha ki khlaw ba rben da ka jingiarap jong ki katto katne ki nongshong shnong, ha kaba la lap ruh ia ki kuli na ka jaka ba jia kane ka jingshah hiar thma bad la sub aba ki riew kiengatiar ki la pyndonkam da ka suloi M16 rifle”, ong ka khubor na ka tnat MHA.
