Shillong, Lber 06:  Wat la ka party kam pat shim ia kano kano ka rai ban pynieng kyrtong  ha kane ka election shiteng samoi sha ka ïing dorbar thaw ain ha Lok Sabha na ka Shillong Parliamentary Constituency, kaba dei ruh hadien ka jingkhlad ba kynsan noh u Dr. Ricky A.J Syngkon kum u MP na ka VPP Party, hynrei haba kren sha ki lad pathai khubor mynta ka sngi ka la long kumba u u Secretary ka Meghalaya Pradesh Congress Committee u Bah Manuel Badwar u la ai ksai lpa ba u MP barim bad uba dei ruh u President ka MPPC u Bah Vincent H. Pala un lah ba long kum u kyrtong ka party Congress ha kane ka election shiteng samoi jong ka election MP na Shillong Parliamentary Constituency.

Kaei kaba paw shabar kumba la pynpaw da utei u heh nongialam ka Congress, ka dei kaba u la kren da kaba ong, ban phah da ki briew kiba thymmai sha parliament ka long kaba kham jynjar bad donkam kita ki briew kiba la don jingtip lypa ha Parliament, namar lada phah da ki briew kiba thymmai ki dang shem jingeh bad ki dang hap ban wad jingtip kumno ki iaid ki kam ki jam ha katei ka ingdorbar thaw ain hapoh ka ri.

U la kren shai ruh kumba long haduh mynta ka party Congress ha ka jylla kam pat shim kano kano ka rai iano ban ai ticket ne ban long kum u  kyrtong  na ka bynta kane ka election shiteng samoi jong ka election MP na Shillong Parliamentary Constituency, hynrei kiei kiba mih shabar ba ma u, un ia khun kum u kyrtogn ka Congress ka dei tang ka jingpynsapriang khubor ha ki rynsan social media bad kam dei satia ka rai jong ka party.

U la ong ruh ba ka Congress kan bishar bniah bha bad kan ai ticket ruh ia u briew uba la don jingtip lypa ha parliament ban ia kaba pynieng da ki briew kiba thymmai, anmar ka samoi treikam ruh ka la sah mynta sa tang 2 snem shiteng ei ei.

U la kren ruh kumba long haduh mynta ki don ar tylli ki mat jingdawa kiba hakhmat eh,  kata ban pyntreikam iaka ILP bad ruh ba ka Ktien Khasi bad Garo ka ioh rung ha ka khyrnit ba phra jong ka riti synshar ka ri, ha kaba donkam ban ioh da ki briew kiba stad kiba la shem phang ban iatai ha katei ka ing dorbar thaw ain ka ri.

U la pynpaw ruh ka party Congress kam pat shim kano kano ka rai ban ai ticket bad ka burom ia ka jingkhlad ba dang shen u Dr. Ricky AJ Syngkon kaba la long ka jingduh kaba khraw ia ka jylla.

Shuh shuh, da kaba ong ba kane ka jingkren jong u, ka dei ka jingsngew shimet, hynrei u la ong ba shen ka party Congress kan wan biang ha ka bor ha ka ri bad lada kine kiei kiei baroh kin urlong ka party Congress kan ia said bad ia tai tyngeh halor ki mat ki jura kiba donkam na ka bynta ka jingmyntoi ki paidbah ha ka jylla bad ka ri hi baroh kawei,  u la bynrap.