Hadien ka jingleit jurip ïaki 3 tylli ki jaka sumar mynta ka sngi ba kynthup ïaka Mawlasnai PHC, ka Tyrso HWC bad ka Thadrang HWC, u Bah Charles Marngar hadien ka jingïakren bad ki nongïalam shnong bad pynpaw ruh ïaka jingeh jong ki halor ka leit ka wan ban kit ïaki nongpang, u la kular ban ai kawei ka kali Ambulance ban shakri naka bynta ki paidbah ba pang ba shitom ha katei ka thaiñ khappud bad ka Assam haka thaiñ Block II.
Ïa katei ka Ambulance yn sa aiti shen sha ki nongïalam shnong ka thaiñ Khappud ban pynïaid khnang ba ka kam kan ïaid beit bad ba kin don kiba khmih ïa katei ka kali naka bynta ka jingbit jingbiang jong ki paidbah.
Naka liang u Bah B Sohtun President ka Synjuk ki Rangbah Shnong Border Area u la pynpaw ka jingsngewkmen halor katei ka jingkular u MLA, bad ai ruh ka jingkhublei ba kyrpang halor ka jingshimkhia jong u ban mang kawei ka Ambulance naka bynta ki paidbah ha khappud ban pynsuk haba kit nongpang.
