Nongpoh, Nailur 14: Ka Kong Christabell Wanniang kum ka General Secretary ka CSWO ha ka sngi Saitjain ka la hiar sha ka Shnong Lamalong ba hap ha ka Mawhati Constituency bad ha kane ka jinghiar jurip sha katei ka shnong ka la ioh lad ban ïa kynduh ïa ki paidbah Nongshong shnong kiba la pynpaw halor ki jingsahdien katei ka shnong khamtam ka jingbym don bording ilektrik bad ka jingshah iehnoh khunswet ka skul Lamalong Government LP/UP School ha ka tnad pule puthi ka sorkar jylla.
Ka Kong Christabell Wanniang ym tang ba ka la ioh jingtip halor ka jingbym poi bording ilektrik sha katei ka shnong ba ki paidabh ki hap ban pyndonkam da ka Solar, hynrei da lade ka la leit jurip ruh ïa katei ka Lamalong Government LP/UP school, ha kaba ka la lap ba ka jinglong jingman katei ka skul la isangsot ïa ki khynnah skul.
Kum ka nongïalam ka seng CSWO, ka Kong Christabell Wanniang ka la pynpaw ba sngew sangsot shisha ïa ka jinglong jingman ka skul naduh ki kamra klas ba ym don jingkhang iit shuh, ka jingduna ki ben bad ki shuki bad kaba pangnud bha ka dei ha ka por slap ba ki khynnah skul ki hap ban pyndonkam da ka shatri ba la leit ka tnum jong ka skul.
Halor kine ki jingeh ba kynduh ki paidbah nongshong shnong bad ki khynanh skul, ka Kong Christabell Wanniang ka la dawa na ka sorkar ba ka dei ban phai khmat mardor sha katei ka shnong khamtam ban pynpoi noh ïa ka bording ilektrik bad ruh ba ai da ka kamra klas kaba paka ha katei ka skul ba kum ki khynnah skul bad ki bor pynïaid skul ki kynduh jingeh na ka jingjot katei ka skul.
Peit ru:
Shuh shuh, ka la ïathuh ruh ba ka la dep pyntip ruh sha u MLA ka Mawhati halor ka jinglong jingman hapoh kane ka shnong bad ka da buh ruh ka jingkyrpad ïa u MLA ba un shim khia lem bad ban ïa kren sha ka sorkar na ka bynta ban pynbit pynbiang ïa kitei ki jingdonkam hapoh ka shnong, ka la bynrap.
