Khliehriat, Jymmang 20: Ka seng Meghalaya People’s United Front (MPUF) East Jaintia Hills District mynta ka sngi ki la pynpaw ia ka jingsngewkhia kaba jur, halor ka jingbym burom ki nongtrei ka ophis District Medical and Health Officer ia ka por ban wan trei, kaba la ktah pynban ia ki paidbah kiba leit ban donkam ha katei ka jaka ai jingsumar ka District.
Ia kane ka seng ka la pynpaw hadien ba mynta ka sngi ryngkat ki katto katne ki noingshong shnong kiba leit donkam na ka bynta ka birth Certificate ki la leit sha katei jaka ai jingsumar bad kaba ka seng ka pynpaw jingsngewkhia ka dei ka jingbym burom ki nongtrei ban burom ia ka por khlem da poi ha ka por ba la buh ka sorkar.
Haba kren halor kane ka bynta u President ka MPUF u Bah Kyrshan Blah u la ong ha ka seng ka sngewkhia ban iohi ba ki nongtrei sorkar kim burom ia ka por ba la buh ban wan trei, namar kane ka ktah ia ki paidbah kiba leit donkam ha kino kino ki ophis sorkar.
U la iathuh ruh ba kane ka jingleit jongki ruh ka la poi haduh 12 baje mynsngi, hynrei ki nongtrei kim pat poi sha katei ka jaka trei, ha kaba kito kiba leit donkam ki la shah ktah bad ki hap ban ap da ki kynta ban ioh ia ka jingdonkam na ka sorkar.
Namar kata, na ka liang ka seng ka dawa ia ki bor ba dei peit katei ka ophis District Medical and Health Officer ba ki dei ban tehlam ia ki nongtrei ba kim dei ban leh mon, namar lada kim lah ban poi ha ka por ba la buh ka sorkar kane ka ktah ia ka jingdonkam jong u paidbah, u la bynrap.
Sa Peit Ruh |
