Nongpoh, Naitung 27: Ka KSU Umsning circle ha ka jingïalam u samla Laraplang Nongbri General Secretary KSU Umsning Circle, ha ka sngi Saitjaiñ ki la pynkupburom ïa 2 ngut ki samla pule ba kynthup ïa u samla Diphren Marten, na ka shnong Ïamkhon uba pule ha Balawan College , ha kaba u la ioh ha ka kyrdan ka ba lai ha ka Bachelor of Arts ha ka subject Khasi na ka skulbah NEHU bad ïa u samla Daymond Kylla, na ka shnong Umsning uba pule ha Synod College bad uba wan ha ka kyrdan ba saw ha ka Bachelor of Arts ha ka subject Political Science na NEHU mynta u snem 2025.
Ha kane ka jingpynkup burom ïa kitei ki 2 ngut ki samla pule na Ri Bhoi la ïa don ryngkat naduh u Samla Prosper Lyngdoh Organising Secretary, u Samla Khrawkupar Tariang Information & Publicity Secretary, u Samla Basumar Makdoh Environment Secretary, uSamla Welclanstar Lyngdoh Asst Education Secretary jong ka KSU Umsning Circle bad la synrang lang ruh da ki dkhot jong ka KSU Sonidan Unit bad KSU Umsning Proper Unit.
Ha kane ka jingpynkup burom ka KSU, u samla Diphren Marten, u la ong ba kum u samla u ïakynduh shibun ki jingeh ha ka por ba u dang pule ha Balawan College, namar u dei ba samla ba sah ha nongkyndong bad u wan na ka longing longsem kaba jynjar ha ka ioh ka kot bad u la ïathuh ruh ba u leit klas tang ar sien ne lai sien ha ka shitaiew na ka daw ba u hap ban leit bylla ban pyndap lang ha ïing ha sem bad um ju kynran dien ban trei shitom na ka bynta ban pyndep ha ka jingpule jong u.
Na ka liang u samla Daymond Kylla, kum u samla pule u la pynpaw da kaba ong ba ka jingpas bha jong u ka dei ka jingpynïaid bastad jong u Blei bad ryngkat ka jingtrei shitom. U la ai mynsiem ruh ïa kiwei ki khun samla ba kim dei ban duh jingkyrmen haba ki don ha ki jingpule bapher bapher, hynrei dei tang ka jingtrei shitom ba wanrah ïa u soh jong ka jingjop, u la pynpaw.
U samla Laraplang Nongbri General Secretary KSU Umsning Circle haba ai jingkren, u la pynpaw ïa ka jingkmen haba ki samla pule ki wan shakhmat ha ki jingpule bapher bapher. Ka jingwan shakhmat ha ka kyrdan ba lai jong u Diphren Marten ha ka subject Khasi, na ka liang u Samla Laraplang u la pynkynmaw ruh ïa ki jingïakhun jong ka seng ban pynbor ïa ka Sorkar Jylla kumjuh ka Sorkar Kmie, ha kaba yn ithuh noh ïa ka ktien Khasi da kaba pynrung ha ka Khyrnit ba phra jong ka rity synsar ka ri bad ba ka ktien Khasi ka dei ban longdoh longsnam ha ngi uwei pa uwei u khun khasi khara, khnang ba ka ktien Khasi kan ïai im bad haba ka ktien ka im ka Jaitbynriew ruh ka im bad ka ieng rasong.
U la ong ruh ba ha ka dong bad ka thain, ki khynnah lane ki samla pule ki la sdang ban wan shakhmat bad watla ki dei ruh ki khynnah nongkyndong, hynrei ki dei kiba proh jabieng bad ki wan shakhmat haba ki ioh ïa ka lad ha ryngkat ka jingthmu kaba skhem bad ba raikut kiba dei hapdeng shibun bah ki jingeh kiba ki ki ïa kynduh. U la ong ruh ba ka seng ka ju ai mynsiem ïa ki samla pule ba kim dei ban duh jingkyrmen haba ki kynduh ïa ki jingeh bad u la kyntu ïa baroh ki samla ba kin shim ka nuksa ba bha na ki bad ba kin ïai trei shitom ha ki jing pule khnang ban ioh ïa u soh jong ka jingjop. Kane ka long katkum ka kyrwoh ba la pynlait da u samla Laraplang Nongbri, General secretary KSU Umsning Circle.
