Mawkyrwat, Jylliew 19:
Ka jingneh lynter jong u slap mynta la kumba katto katne sngi, ka pynlong ia kiba bun ki jaka ba kin shong synjor bad twa noh ha ki bynta jong ka South West Khasi Hills District. Kane ka jingtwa khyndew, ka la wanrah ruh ia ka jingjulor ia kumba phra tylli ki long jong ka thain.
Katkum ka khubor ba la ioh lum jingtip na u Dr ES Langshiang, uba dei u District Management Authority Officer (DMAO) ka South West Khasi Hills District, la iathuh ba kumba 2 tylli ki longing ha ka shnong Lower Mawpud, 3 tylli ha ka snong Dommawlein, 2 tylli ha ka shnong Sarin bad kawei ka longing ha ka shnong Nongpdengkenbah-Nongthymmai, ki la julor na ka jingtwa khyndew hynnin ka sngi.
U DMAO u la pyntip ruh ba nalor katei ka jingshah pynjulor jong ki ing ki sem, ka la don ruh ka jingtwa khyndew ha ki lynti iaid kjat jong ka shnong Mawpud bad Lower Mawpud bad ruh ha ki bynta jong ka surok kaba pyniasoh na Rangthong sha Sarin.
La ioh jingtip ruh ba ha kawei pat ka jingjia, kumba 11 tylli ki masi ki la iap noh hadien ka jingshah pom pyrthat ha ka shnong Rangthong, kaba la jia ha ka por jong ka jingther jong u ‘lapbah. Kitei ki masi kidei kiba la long trai da u Bah Tonel Iawphniaw.
