Ka nongïalam ka KSU West Jaiñtia Hills District Unit lem bad ka KSU War Jaintia Circle hynnin ka 7 tarik Nailar kila leit ban hiar sha ka thaiñ Dawi-Amlympiang bad kiwei de ki jaka khappud bad ka ri Bangladesh naka bynta ban ïathir ïatai bad ki nongïalam shnong halor ka jinglong jingman ha shilynter ki bynta jong ka khappud Indo-Bangla namar ka jingkynad bad ka thma pohiing kaba la jia haka ri Bangladesh.
Naka liang ka seng kala ioh ruh ban kynduh bad ki nongïalam shnong ha katei ka thai ka thaiñ bad ioh ruh ban mir jingmut bad ki Dorbar Shnong ban long kiba la khreh ban ïakhun ïa kino kino ki jingeh bad jingïaleh la ka long ha kano kano ka rukom lada ki khar Bangladesh ki wan ban rung beaiñ sha ka ri India lyngba ka khappud jong ka thaiñ Dawki.
Naka liang ka seng ha katei ka sngi kala ioh ruh ban ïakynduh ïa u Officer Incharge ka Infiltration Dawki bad la ioh jingtip ruh ba ki nong Bangladesh ki pyrshang ban rung sha Meghalaya (India) hynrei kim ioh shuh namar ka jingkhang jong ophis Migration jong ka ri Bangladesh.
Shuh shuh ka seng kala leit ruh ban jurip katto katne tylli ki jaka kiba ki khar Bangladesh ki pyndonkam ban rung tuh sha ka jylla Meghalaya lyngba ka shnong Amlympiang ha kaba bunsien ki khar Bangladesh ki ioh lad ban rung sha ka ri India, bad kaba sngewsih ka long ba haduh mynta katei ka jaka kam don satia ki nongpahara ne ki shipai ïada pud ban peit pyrman ïaka rung ka mih briew naka ri Bangladesh.
