Ka seng Khasi Students’ Union, Wahthapbru Unit mynta ka step jong ka 23 tarik, Nailar 2024 kala pynlong ka jingkynmaw burom ïa ka lyngkhuh sngi ïap ba 24 jong 2 ngut ki nongïalam ba shitrhem ka seng KSU kiba la lah kyllon ïap haka ktang suloi ki pulit ka jylla Meghalaya.
Kitei ki 2 ngut ki dkhot ba shitrhem ka seng ki kynthup ïa u Samla Dawanbiang Shullai, Asst Finance Secretary KSU CEC bad u Samla Rocky Shylla, Sport Secretary KSU Wahthapbru Unit.
Kum ban shu pynkynmaw, kitei ki arngut ki nongïalam ba shitrhem jong ka KSU ki lah shah bthat jubor ïa ka jingim ha ki pulit ka jylla ha ka 23 tarik, Nailar jong u snem 2000, ha Nongshiliang Shillong katba ki dang ïa shongkai ha ka wei ka ïing bad u Balajied Dkhar ba ju khot sien u Hepkhoit u ba dei u dkhot jong ka seng kieng atiar HNLC, hynrei kum ha katei ka por kyndit kynsan ki pulit ka jylla Meghalaya kiba wan khynra ïa katei ka ïing ki lah shu synreit kuli naphang ïa kitei ki 3 ngut ki Samla Khasi da ka jingsuba ba ki dei ki dkhot jong ka kynhun lehnoh NSCN-IM.
Namarkata ha kane ka sngi na ka liang ka KSU Wahthapbru Unit ka pynkynmaw ba ka dei ka sngi kaba dum tam ïa ka jaitbynriew bad kum ka seng da lei lei kam lah ban shu klet noh ïa ki dak mong kiba la kylla sohkhliang bad shijunom kan pyrto nam ban pynsah jingkynmaw ïa ki nongialam bad ki dkhot ba hashuwa jong ngi kiba lah phla ïala ka jingim nabynta ka dawbah jong ka ri bad ka jaitbynriew.
Katkum ka kyrwoh bala phah da ka KSU Wahthapbru Unit kala pynpaw ruh ba haduh katkine ki sngi na ka liang ka tnat pulit ki thrang eh hir hir ban khylliap lama noh ïa ka seng KSU da ka jingpharep ba har rukom da ka jingpyrshang ban pyntieng koh tympan ha kiba bun ki liang ïaki dkhot da kaba bom bad tied, bad set phatok bad wat haduh ban shim syndon ïa ka jingim jong ki dkhot ka seng ruh kim salia shuh, hynrei kane ka jingpyntieng ki pulit kan nym lah ban pynkhyllem ïaka mynsiem ïaleh bad ka Nongrim ba skhem jong ka seng naka bynta ban ai jingshakri ïaka ri bad ka jaitbynriew.
Lyngba kane ka kyrwoh naka liang ka KSU Wahthapbru unit ka phah ruh ïa ka jing sngew lem sha ki bahaiing ha sem jong kine ki lai ngut ki samla, pynkut ka kyrwoh na ka KSU Wahthapbru Unit.
