Ka jingiashun hapdeng u Myntri Rangbah ka jylla Assam, Himanta Biswa Sarma pyrshah ia ka University of Science and Technology, Meghalaya (USTM) la iohi ba ka dang jur kat dang mih ki sngi ki por, kat haduh ba utei u Myntri Rangbah ka jylla Assam u la byrngem syndon ba ki samla pule kiba la pyndep na katei ka skulbah, kim nym lah shuh ban thep ha ki kam sorkar hapoh ka jylla Assam.
U Himanta Biswa Sarma u la iathuh ruh ba u la bthah ia ka Legal Department na ka bynta wad ia ki lad ki lynti kumno ban pynduh kam sorkar ia ki samla pule kiba pyndep na katei ka skulbah USTM, bad lada dei ban thung kam ruh, ki hap ban iakhun biang sa ia kawei ka eksamin ban iohkam hapoh ka jylla Assam.
Kumba da ki hajar ngut ki samla na ka jylla Assam ki la wan ban pule ha katei ka skulbah, u Himanta u la kren shai ba ki samla pule Assamese, kim dei satia ban pule sha USTM kaba hap ban siew pisa, hynrei ba kin pule beit hapoh ka jylla Assam khlem don kam siew eiei ruh em.
Kumban shu kdew, ka jingmih ka thma ktien hapdeng u Himanta Biswa Sarma pyrshah ia katei ka skulbah, kadei hadien ka jingther jong u lap ha kine ki khyndiat taiew kiba lah dep kaba wanrah ia ka jingshlei um kaba jur ha ki bun ki bynta jong ka sor Guwahati, ia kaba u Himanta Biswa Sarma u la kynnoh ba kadei ka um kaba la tuid na ka jingtih pathar ia ki lum ha katei ka skulbah USTM.
U Himanta Biswa Sarma, u la kynthoh jur ruh halor ka jingshna ia ka Purno A Sangma International Medical College & Hospital hapoh katei ka skul bah da kaba ong ba la shna ia katei ka jaka ai jingsumar khlem ki nongpang. U la kam ruh ba ha ka jingwan jurip jong ka National Medical Council, katei ka skulbah kala pyni da ki nongpang thok bad kynnoh ruh ba ka jingshna ia ka Purno A Sangma International Medical College & Hospital kadei ka jingthmu ban pynjot ia ka Gauhati Medical College & Hospital.
