Namar ka jinglong jingman bad ka suk ka sain, ha Bangladesh, ki shipai iada khappud Border Security Force (BSF) Meghalaya kila pyntreikam daka ‘Ops Alert’ haki thain khappud Meghalaya-Bangladesh ban pynthikna baka jingsynshar khaddar ka treikam.
Ki BSF kiba ap ha khappud bad ka Ri Bangladesh kaba jrong 444 km ki la pynjur ia ki lad jingiada ha shilynter ki khappud.
U Inspector General (IG) ka BSF Meghalaya u Harbax Singh Dhillon u la pynpaw ba kawei na ki jingeh ba hakhmat eh ha kum kane ka khyllipmat ka long ka jingwanphai suk jong ki samla pule na India kiba pule sha Bangladesh.
La iathuh ba naduh ka 18 tarik Naitung, 2024, ki shipai BSF Meghalaya ka la pynsuk ia ka jingwan rung jong ki 574 ngut ki samla pule na India, kumba 435 ngut na Nepal, bad 8 ngut na Bhutan lyngba ka Dawki Integrated Check Post (ICP) kaba don ha East Khasi Hills District.
Nalor kata, ki don 18 ngut ki samla pule kiba la rung mynta ka sngi lyngba ka ICP Kilapara kaba don ha West Garo Hills district jong ka jylla Meghalaya.
U IG BSF Meghalaya u la bthah ïa ki ophisar BSF ban pynsuk ïa ki nong India khamtam ïa ki samla pule kiba rung lyngba ka ICP Dawki bad ICP Kilapara da kaba ai ïa ki jingïarap kiba lah kum ka um dih, ki jingbam bad ki jingïarap dawai nalor ban pynsuk ïa ka leit ka wan jong ki sha la ki jong ki jaka.
Da kaba pynthikna ia ka jingiarap na ki BSF sha baroh ki nongshong shnong na ki ri bapher bapher khamtam ki nongshong shnong ka ri India kiba rung sha ki jaka jong ka ri India lyngba ki lad kiba biang, u la pynpaw ba la pynkhlain ia ka jingpahara ha shilynter khappud Indo-Bangladesh ban pynthikna ba kano kano ka jingwan rung kyrthep lane ka jingrung beain jong kino kino ki briew ba nabar.
