U Myntri Rangbah ka jylla u Conrad K Sangma u la pynshai ba ka sorkar kan nym pynkynriah ïaki Huleng (Hoolock Gibbon) na Sonja Wildlife Rescue Centre kaba don ha rilum Garo sha kiwei pat ki zoo, khamtam ka Meghalaya State Zoo kaba don ha Umtrew ha Ri-Bhoi District.
Lyngba ka rynsan X u Myntri Rangbah ka jylla u la pynpaw ba ka sorkar kam shym la rai ban pynkynriah ia ki jait shrieh Hoolock Gibbons na ka jaka ba ki don mynta. Ka long ka khubor kaba bakla ba ngi pynkynriah ia ki, wat la kala don ka jingtyrwa naka ka bor pyniaid jong ka Central Zoo Authority (CZA).
Kum ban shu kdew hangne naka liang ka kynhun Achik Conscious Holistically Integrated Krima (ACHIK), ki la pynpaw ia ka jingpyrshah kaba jur halor ka jingthmu ka sorkar ban pynkynriah noh ia ki Huleng na Sonja Wildlife Rescue Centre sha kiwei ki Zoo ha ka jylla namar kine ki shrieh ba la tip kum ki Huleng (Hoolock Gibbon) ki dei kiba la mlien ban im ha Ri Lum Garo bad kumno ka sorkar kan pynkynriah jaka ia ki, kaba lah ban don ka jingktah na ka jinglong jingman ka mariang ne ka rukom im ka rukom sah jong ki.
