Nongpoh, Nailar 11: Tang hadien 3 sngi ba ka Assam State Electricity Board ha ka 9 tarik u Nailar 2025 ka la wan thung ia 2 tylli ki post Ilektrik sha u pud u sam ka Shnong Mawikhuli, mynta ka sngi la mih ka jingiakynad bad ka thma ktien kaba jur hapdeng ki paidbah nongshong shnong ka Maikhuli bad ki paidbah nongshong shnong ka jylla Assam ha katei ka shnong Khappud Meghalaya bad Assam.
Kumba la ioh lum jingtip, la ong ba ki paidbah nongshong shnong bad ka shnong Maikhuli ki la pyrshah naduh ka sngi Saitjain halor ka jingwan thung post ielektrik ka ASEB ha ka shnong Maikhuli, hynrei ka bor shnong ka la pyntip sha ka bor synshar District ban leh ia kaba donkam ban weng ia kitei ki Post Ilektrik, hynrei na ka jingpynibor ki briew na Assam ka jingiapyrshah bad ka thma ktien kaba jur ka la mih mynta ka sngi haduh ba la hap ban wan poi ki Magistrate bad ki Pulit na Ri Bhoi bad na Kamrup ban tem ia kane ka jingiakynad.
La iathuh ruh ka daw kaba la mih kane ka jingiakynad ka dei tang na ka daw ka jingpynsngewthuh bakla uwei u briew na Assam ba la tip kyrteng kum u Madhav Deka, uba la pynialam bakla lut ia ki paidbah na ki shnong khappud ka Assam bad ha ka jingshisha ia kane ka kam la dei ban ia kren da ka bor synshar District ka Ri Bhoi bad ka Kamrup.
Dei lyngba ka jingkynshoit utei u briew la mih ka jingiakynad ban pyrshah halor ka jingthung ia kitei ki Post Ilektrik haduh ba la hap ban wan poi Magistrate bad ki Pulit. Ka long ruh kaba sngewkhia ba da ka jingkynshoit utei u briew ki paidbah na Assam kim burom shuh wat ia ki bor synshar District kiba wan ban tem ia kane ka jingiakynad.
La iathuh ruh ba ka shnong ka ap mynta ia ka rai jong ka ophis u Deputy Commiissioner ban ia kren mardor bad u Deputy Commissioner ka Kamrup, bad lada ka jingiakren kam seisoh, ki paidbah ka shnong Maikhuli ki la shim ia ka rai ba kin sa weng hi kitei ki post ilektrik ba la wan thung beain sha u pud u sam ka Shnong Maikhuli ba hap ha ka jylla Meghalaya.
