NANG IAI TREISHITOM KI SHIPAI & BOR PULIT HA MIZORAM BAN PYNDUH IA KA JINGSHALAN DRUG: IOHKEM DRUG BA PALAT 16.38 KLUR TYNGKA

Mizoram, Jylliew 13: Ha ka jingbteng ia ka jingiakhun pyrshah ban rad dyngkhong ia u drug bad ruh ban pynshitom ia kiba saplai ia kine ki jingdih buaid kiba la khang bad mana tyngeh da ka sorkar India, na ka liang ki bor shipai ka Assam Riffles lem bad ka jingiatreilang ruh bad ki bor ka Special Narcotics. CID (Crime) na Aizawl Mizoram ki la ioh biang ban kyndang ia ka ktem ki nongsalan drug ha ka jylla Mizoram bad ban kurup ruh ia u drug Heroine ha ka jingkhia kumba 2.34 kilogram katba ka dor pat ka la kot sha ka palat 16.38 crore.
Lah ban kdew, ba ki shipai ka Assam Riffles kiba ju snohkti lang bad ki bor pyniaid district jong ka jylla Mizoram ha ka nongbah Aizawl, ki la nang treishitom ban pynduh jaid ia ki jingsniew kiba mih na u drug khamtam ban pynduh jaid ia ka jingshalan ia u drug bad ban kem ia kiba donkti ha kane ka kam shalan drug. Ha ka jingioh jingtip ba kan don ka jingshalan ia u drug, ki shipai ha ryngkat ki pulit ka Aizawl ki la pynap shrip ia kiba donkti ha kane ka kam ha ka jaka hajan ka Keifang Quary, Saitual District hapoh Mizoram.
Na ka liang ki bor shipai, ka Assam Riffles lem bad ki pulit ka Mizoram hadien ka jingioh jingtip ia ka jingthmu ban shalan ia u heroine, ki la pynap shrip ia ki nongshalan bad ban iohkem ia ki, bad ha kane ka jingkhynra la iohkem ia kiba donkti shalan drug bad ruh ia u drug heroine ba la song bha ha ki 20 tylli ki jingsong saboh (Soap Case). Ki pulit ki la kem ruh ia arngut ki briew ba donkti ha kane ka kam shalan drug ba kynthup ia u wei u briew ba na Myanmar.
Hadien ka jingkhmieh kaba bniah ia ka jingshalan ia u drug heroine ba la kot da ki phew klur tyngka, na ka liang ki bor pulit ki la aiti ban pynlong pat ia ka jingtohkit sha ka Special Narcotics, CID (Crimes) Aizawl bad ka jingtohkit kan dang iaid ha ryngkat ka jingnang treishitom ban rad dyngkhong ia ka jingshalan drug ha kane ka jylla jong ka thain shatei lam mihngi ka ri India.