Mumbai, Jylliew 25: Ka High Court jong ka Bombay, ka la hukum ban phah pynlait noh ia u wei u khynnah rit (Juvenile) u ba la kynnoh donkti ha ka jingtynrah kali ka kali Porsche kaba la jia ha Pune bad la ailad ruh ia kawei ka longkmie kaba long kum ka kynja kmie ia u ne u khynnah ban shimti ia u sha ka jaka sah ba kyrpang (Special Observation Home).
Kane ka longkmie kaba la ioh ban shimti ia u ne khynnah rit kum ka kynja kmie (Parental Aunt) katkum ka Child in Conflict With law (CCL) ka la dep ban thoh (writ petition) sha ka High Court, kaba la kdew ba katkum ka kyndon aiñ Juvenile Justice (Care and Protection of Children) Act, 2015, ka CCL ka donkam ban pyntikna ba ka nym don kano kano ka jingiatyngkhuh bad ka aiñ ka bym pynrem ia u ba donkti ha ka jingtynrah kali Porche kum u nongleh kam sniew ba shyrkhei ha kaba u ne u khynnah rit u la shah kem da kaba kynnoh leh donbor (unlawful and arbitrary manner)
Kumban kdew, ha ka step phyrngap jong ka 19 tarik Jymmang, u wei u khynnah rit u ba la ñiah ia ka kali remdor ka Porsche hapdeng ka jingbuaid bad ba pynher sted ia ka kali, u la leit ban tynrah ia kawei ka kali ar shaka haduh ba arngut ki briew kiba dei ki Software Engineers ba kynthup ia u Aneesh Awadhiya bad ka Ashwini Koshta ki la khlad hashen ha kane ka jingjia kaba la jia ha Pune’s Kalyani Nagar.
Na ka liang ka Iingbishar, ka la sakhi ba ka jingset patok ia u ne u khynnah ka long beaiñ bad iaid lait ia ki kyndon aiñ kumta la bthah bad aiti noh ia u ne u khynnah sha ka longkmie kum ka kynja kmie (Parental Aunt). Ka Iingbishar, ka la pynshai ruh, ba ia u ne u khynnah u ba dang don hapdeng ka jingshah sumar (Rehabilitation) da ka jingthmu ban aiti ia ka jingsumar sha u doctor (Psychologist) bad ka jingsumar ka dei ban nang iaid, ong ka kaiphod.
