Hadien ba ka kynhun ki Doctor hapoh ka lama jong ka Indian Medical Association kala pynbna ïaka jingiakhih ba 24 kynta ha baroh kawei ka ri, kum ka jingpyrshah ïaka jingshah pyniap dusmon jong kawei ka samla kaba dang pule Doctor ha RG Kar Medical College and Hospital, kila buh ruh ki mat dawa ba hakhmat eh naka bynta ka jingshngaiñ ki nongtrei ka koit ka khiah haka ri.
Kane ka jingiakhih ki doctor kala ktah ruh ia kiba bun ki jaka sumar bad ki paidbah namar baroh ki OPD haki hospital la khang khyrdep mynta ka sngi.
Kitei ki mat dawa ba hakhmat bala buh da ka Indian Medical Association ki kynthup:-
Ban pyntreikam iaka polisi kaba kongsan ban weng ia ka jingshah thombor jong ki doktor bad ki hospital. Kane ka kynhun jong ki doktor ka pynbor ba ka aiñ jong ka sorkar pdeng ka ban pynrung ïa ki jingpynkylla ba la leh ha u snem 2023 ha ka Epidemic Diseases Act jong u snem 1897 sha ka Hospital Protection Bill 2019. Kane ka sienjam, kan pynkhlaiñ ïa ka aiñ kaba la don lypa ha ki 25 tylli ki jylla. Ka IMA ka la ai jingmut ba ka hukum kaba ïasyriem bad kaba la pyntreikam haka por Covid-19 kan long kaba biang ha kane ka jinglong jingman kaba mynta.
Ka IMA ka la dawa ruh ba dei ban pynbna ia ki hospital kum ki jaka ba shngain ha kaba ka sienjam kaba nyngkong ka long ban ai ia ki hok pahara kiba donkam. “Ki kyndon pahara jong baroh ki hospital kim dei ban duna kum ki kad liengsuin ryngkat ki kor CCTV”.
Ka IMA ka la dawa ban pynbeit thymmai ia ka rukom treikam bad ka jingim jong ki doktor kiba sah kynthup ia ka kam kaba 36 kynta kaba ka samla bala shah pyniap ka hap ban leh bad ka jingbym don ki jaka kiba shngain ban shongthait.
Ka IMA ka la dawa ruh ia ka jingtohkit “ba bniah bad ba tbit” ia ka jingjia ba shyrkhei ha Kolkata ha ka por ba la buh bad ban ai ia ka jingbishar ba hok nalor ban ithuh ia kito kiba donkti ha ka jingpynjot pynpra ia ka jaka sumar bad ba dei ban ai ka jingpynshitom kaba tyngeh.
Ka kynhun jong ki doktor ka la dawa ruh ia ka bai lutksan ia ka iing ka sem jong ka samla kaba la khlad noh.
