Ka long jingai mynsiem ia kiwei ki nongshong shnong ka jylla Meghalaya bad ka ri India hi baroh kawei, ha kaba uwei u rangbah na Rilum Jaintia u la ioh pdiang ia ka khusnam ha ka 7 tarik u Nailar 2024 ha Nongbah Delhi ba la tip kum ka “SUSTAINABLE AGRICULTURE SUMMIT & AWARDS-2024” ba pynbit pynbiang da ka Agriculturepost.com bad ka Indiagri (News, Vies & Issues on Agriculture).
Une u rangbah na Rilum Jaintia ba la ioh pdiang ia kane ka khusnam la tip kyrteng kum u Bah Self Denial Lyngdoh (Bahkhla) uba dei u Chairman ka “Thwai Syiem Society”, Sutnga na East Jaintia Hills jong ka jylla Meghalaya.
La sam ruh ia kane ka khusnam da u MP ka Rajya Sabha u Sanjay Kr. Jha ha ka jingdon ryngkat u Ramdas Athawle, uba dei u myntri khynnah ka sorkar pdeng ba dei peit ia ka tnad Social Justice & Empowerment jong ka sorkar India bad la don lang ruh u Nongrah ktien ka Brazil sha India u H.K Kenneth Felix Haczynski.
Kane ka jingioh khusnam une u rangbah ka dei ruh halor ki ar tylli ki bynta, kata ka bynta ka nyngkong ka long ba u dei u rangbah uba la kyntiew ia ka kam rep kiba dei ki rukom rep kiba iada ia ka mei mariang bad ka bynta kaba ar pat ka dei kaba u thung ia ki jingthung ia u Sohniamtra (Mandarin Oranges hapoh ka jylla Meghalaya.
Kane ka jingioh ia kane ka khusnam ka dei ruh da ka jingialam lynti bad ka jingai jingmut jong u Pankaj Kr Pathak, Member ka ESIC, Ministry of Labour & Employment, ka sorkar India bad ruh ha ka jingkyrshan u Dr. Evarist Myrsing, uba dei u State General Secretary, ka BJP Meghalaya.
Kum ban pynpaw ia ki kam ba radbah u Bah Selfdenial Lyngdoh, ka dei ka jingshim rai jong u ban pynlong jyrngam ia ka jaka tih dewiong ha Ri Lum Jaintia, kaba u la sangeh ban tih dewiong bad kitei ki jaka kaba don ka jingheh kumba 100 Akar Duna u la thung da u Sohniamtra bad ki dieng kaba long shi bynta ban pynjyrngam biang ia kane ka jaka kaba la syllen sha ka khlaw ba jyrngam bad kaba u la leh ruh shibun ki kam kiba pynjyrngam beit ia ka mei mariang na ka bynta ban pynneh pynsah ruh ia ki kynja jingim baroh kiba don hapneh ka mei mariang.
