Nongpoh, Naiwieng 12: U Nongniah jong kawei ka trok ki maw Clinker ba la tip kyrteng kum u Neverson Shadap na ka shnong Nongryngkoh, West Jaintia Hills u la mynsaw jur bad ngat ha ka jingkdiah ki kja, kaba dei hadien ba katei ka trok kaba u niah ka la leit ban tynrah ïa kawei ka trok kaba ieng harud jong ka surok National Highway 6, ha ki bynta jong ka shnong 12 Mer, Ri Bhoi District.
Kumba la ioh lum jingtip na ki bor pulit ka Ri Bhoi, la ong ba katei ka jingjia kadei kaba la jia ha ka por 4:30 baje mynstep katba katei ka trok kaba la niah da u Bah Neverson Shadap, kaba don ïa u number ML11 A1436 ka dang hiar sha ki thain Guwahati, hynrei ynda poi ha 12 Mer, ka la leit ban tynrah nadien jong kawei pat ka trok kaba don ïa u number NL01 AD5135, kaba ieng harud ka surok.
Shuh shuh, la ong ruh ki bor pulit bad ryngkat ka jingïarap na ki nongtrei ka Fire & Emergency Service ki la ioh ban sei tad haduh 2 kynta tam ïa u Bah Neverson uba la sahkut hapoh katei ka kali kaba la pra phom ha ki bynta ba shakhmat, kaba dei na katei ka jingjia ïa tyngkhuh kali.
Shuh shuh, ïa u Bah Neverson Shadap hadien ba la lah ban sei na ka jingsahkut hapoh ka trok la pynkit noh mar mar sha Guwahati Medical College & Hospital (GMCH) na ka bynta ban ioh ïa ka jingsumar kaba mardor bad ki Pulit ki dang pynlong ruh ïa ka jingtohkit kaba bniah halor kane ka jingïatyngkhuh kali.
