Nongpoh, Lber 16: Kum u nongmihkhmat paidbah ka Jirang Constituency, u Bah Sosthenes Sohtun da kaba mynsiem kaba sngewkhia halor ka jingioh nam ka Byrnihat kum ka jaka ba jaboh tem ka lyer ha ka pyrthei, u la shim ia ka kabu ban ai khublei kyrpang ia u Myntri rangbah ka jylla, u Conrad K. Sangma ba kum u myntri rangbah ka jylla u la kular ban shim khia ban thaw ia ki lad ki lynti na ka bynta ban wan rah biang ia ka lyer kaba khuid ha Byrnihat.
U Bah Sosthenes Sohtun kum u MLA ka Jirang, u la dep rah ruh ia kane ka mat ha ka dorbar mang tyngka ka sorkar kaba dang shu dep shen ban kyrpad ia ka sorkar ban thaw ia kita ki lad ki lynti ban ia khun ia kane ka lyer jaboh bad ha kawei ka bynta u la ai khublei kyrpang ia u Myntri rangbah uba la ai ka jingkular kaba skhem ba ka sorkar kan shim khia ban weng noh ia katei ka lyer jaboh.
Kum ban pynkynmaw, kumba la mih ha ki lad pathai khubor bad katkum ka World Air Quality Report 2024 ba la pynmih da ka Swiss air quality technology company IQAir, ka Byrnihat ka la ioh ia kata ka nam kum ka jaka ba jaboh tam ka lyer ha ka pyrthei, kaba lah ban dei da ka jingdon bun ki Kharkhana na Meghalaya bad Assam, ba ka Byrniaht ka don ha khappud ka Meghalaya bad Assam.
Haba kren sha ki lad pathai khubor, u Bah Sosthenes Sohtun, u la pynpaw ia ka mynsiem jong ka jingkmen ba hadien ba u la rah ia kane ka mat ha ka dorbar mang tyngka ka jylla, u myntri rangbah ka jylla u Conrad K. Sangma ym tang ba u la ai ka jingpynshai halor ka thong ka sorkar ha ka dorbar mang tyngka, hynrei u la kular ruh ba ka sorkar kan shim khia ban thaw ia ki lad ki lynti na ka bynta ban wan rah biang ia lyer kaba khuid ha Byrnihat.
“Nga sngewkmen ruh ba u Myntri rangbah ka jylla, u Conrad K. Sangma u la pynpaw ruh ba u la dep ban phah da ka jingthoh kaba kyrpang sha u Myntri rangbah ka jylla Assam ban ia trei lang lyngba kata ka ‘Joint Action’, namar ka jingmih ki lyer jaboh ka dei ruh na ki Karkhana kiba don ha Meghalaya bad ha Assam, ba ka Byrnihat ka don ha khappud ka Meghalaya bad ka Assam” ong u Bah Sosthenes Sohtun.
U la ong ruh kumba u la pynpaw ha ka dorbar mang tyngka, u dap shisha da ka mynsiem ka jingsngewkhia ba kata ka jingmih ka lyer jaboh ka ktah shisha ia ka koit ka khiah ki paidbah, ia ki jingthung jingtep bad wat ia ka mei mariang bad ka jingkular skhem u Myntri rangbah ban shim khia ka long shisha ka jingkmen ym tang ia u kum u MLA bad ia ki paidbah ka thain Byrnihat hi baroh kawei.
U la ong ruh ba kum u nongmihkhmat paidbah u ai khublei kyrpang ruh ia u Myntri rangbah ka jylla bad ia u myntri rangbah ka Assam, ba lyngba kata ka joint action kin pynlong ia ka jingiatrei lang na kabynta ban don bynta ruh ki riew shemphang ki ban bishar bniah bad ba kin leh katkum ki lynti jong ka jingstad ka juk ba mynta ban pynduna noh ia ka jingmih kata ka lyer jaboh.
Ha kawei ka bynta, u la kyrpad ruh ia ki bor ba dei peit ia kane ka kam la ka long na Meghalaya bad na Assam ba kin dang buddien ia kane ka kam bad khamtam ban tehlakam ia ki Karkhana kiba pynmih bun ia ki lyer jaboh, namar kane ka ktha shisha ia ka koit ka khiah ki paidbah bad ruh wat ia ka mei mariang.
Namarkata, u la bynrap ruh da kaba ong ba kum u nongmihkhmat paidbah u kyrpad jur ia ka sorkar Meghalaya ba kan pynsted ia ka kam ban ia khun pyrshah ia ka lyer jaboh bad kum u nongmihkhmat paidbah ruh un dang iai buddien bad ban ai ka jingiatrei lang khnang ban lah ban wan rah biang ia ka Byrnihat kum kata ka jaka kaba khuid ka lyer khnang ba kan nym ktah ia ka koit ka khiah ki paidbah bad ruh wat ia ka mariang, u la bynrap.
