Nongpoh, Naitung 03: Naduh ki Longkmie ki longkpa bad ki khun samla jong ka shnong Umling Umsarang mynta ka sngi ki la hap ban mih paidbah na ka bynta ban maramot ia ka surok, kaba dei halor ka Nongrim ka jingsyrtok ha ka leit ka wan na ka daw ka jingsniew jong ka surok kaba pyniasoh na National Highway-6 sha ka Shnong Umling Umsarang.
Haba mih ban maramot ia kane ka surok, la ialam da u Rangbah shnong, u Bah Throlin Thangkhiew ryngkat kiwei ki nongialam bad la ia don kti lang naduh ki Longkmie bad ki Longkpa. Kane ka jingmih jongki ban maramot ruh ki hap ban pyndap da u mawria ba la pan na ka NHAI, kaba long shi bynta ban pynsuk ia ki ha ka leit ka wan ha kum kane ka por ktieh bad por slap, ba ki la shitom shisha ha ka leit ka wan sha katei ka shnong.
Haba kren sha ki lad pathai khubor, u Rangbah Shnong ka Shnong Umling Umsarang, u Bah Throlin Thangkhiew, u la ong ba kane ka surok ka dei ka surok kaba la shah iehnoh bein mynta la 40 tylli ki snem, kata naduh ba la seng ia katei ka shnong, ha kaba ka jingdon ki tnum ïing ka la kot sha ki 40 tylli ki longïing bad ka long pat kaba sngewsih ba ki paidbah ki hap ban kynduh mawsiang ha ka leit ka wan, kaba dei na ka daw ka jingsniew jong ka surok, kaba haduh mynta ka dang dei tang ka surok khyndew bad ka surok ktieh ha ka por lyiur.
U la iathuh ruh ha ka jingshisha, na ka liang ka bor shnong ka la ju leit ban pan jingiarap na ka tnad PWD bad wat na ki nongmihkhmat ban kyrpad ban siang rong ia katei ka surok, kaba don shitda na ka surok National Highway-6 ha Ri Bhoi, hynrei kane ka jingkyrpad ka bor shnong kam shym la seisoh wat haduh kine ki sngi.
Namarkata, na ka liang ka bor shnong ka dang bteng ban tied jingkhang sha ka jingkhang ka sorkar lyngba ka tnad PWD bad ruh naduh ki MLA bad ka sorkar, ba ka dei ban phai khmat noh sha kane ka shnong ban pynioh surok rong bad lada ka sorkar ka kloi ban ai da ka surok rong ba paka, kan long shisha ka jingkyrkhu ia ki paidbah nongshong shnong ha ka leit ka wan bad kin lait noh na ka jingsyrtok, kaba dei na ka jingsniew ka surok kaba ki la mad mynta la 40 tylli ki snem, u la bynrap.
