Ka tnad Pulit Ri Bhoi mytna ka sngi ku ka jingpynshlur ia ki pulit ophisar bada kiwei ki nongtrei Pulit ha ka District ka la sam da ka khusnam sha kito kiba la ai ka jingshakri kaba bha tam bad kiba la don bynta ha kaba ia khun pyrshah ia bun ki kam snniew kaba long ka thong ban wan rah ia ka shongsuk shongsain ki paidbah ha ka District.
Ia kane ka jingsam ia ka khusnam la wan ban shim bynta da ka DGP ka Jylla, ka Idashisha Nongrang kum ka kongsan ban sam ia kitei ki khusnam ba la aiti sha ki Pulit, ha ka jingialang sam khusnam ba la pynlong ha phylla ka ophis u SP ka Ri Bhoi District ha Nongpoh.
Ha kane ka sngi, la don ryngkat ruh naduh u Superintendent of Police ka Ri Bhoi u Jagpal Singh Dhanoa, u Additional SP ka Ri Bhoi, u Bah Banralang Jyrwa bad kynthup kiwei kiwei ki ophisar bad ki pulit kiba ai ka jingshakri na ki bynta bapher bapher ka Ri Bhoi.
Ha kane ka sngi, nalor ka jingsam ia ki khusnam ai jingpynshlur sha ki pulit kiba la shakri bha ha kaba ia khun pyrshah ia ki kam sniew, ka tnad Pulit Ri Bhoi ka la sam ruh ia ka khusnam kyrpang ia u UBC Alan Marbaniang bad ka WPC Wadalin Syiemiong na 6th Battalion Umran kiba la wan rah burom ia ka tnad Pulit ka jylla da kaba ki la ioh khur ia ka takma ksiar na ka lymgpung iakhun kti ba la tip kum ka ‘73rd All India Police Wrestling Cluster 2024’ kaba la long ha SAI Stadium Lucknow ha ka jylla Utter Pradesh.
Hba ai jingkren ha kane ka sngi kum ka kongsan, ka Kong Idashisha Nongrang ka la pynpaw ia ka jingkmen sha baroh ki pulit kiba la trei shitom ban ia khun ia ki kam sniew bad ka jingshakri kaba ki la ai na ka bynta ban wan rah ia ka shongsuk shongsain ki paidbah ha kane ka District bad ha ka jylla hi baroh kawei.
Shuh shuh, ka la ai khublei kyrpang ruh ia baroh ki pulit ophisar bad ruh kito kiba la ioh pdiang ia kine ki khusnam jingpynshlur na ka tnad Pulit ka Ri Bhoi ba kin dang ai ka jingshakri kaba bha tam ban ia khun pyrshah ia ki kam sniew ha ka imlang ka sahlang bad ruh ba kin dang bteng ia ka jingshakri ban pynneh ia ka shongsuk shongsain ki paidbah ha kane ka District, kaba dei lyngba ka jingiatrei lang na baroh ki Pulit ha kane ka District.
